«Манчестер Сити» ҳужумчиси Антуан Семеньо Европа Чемпионлар лигаси умумий босқичининг 2-турида «ПСЖ»дан учралган 2:4 ҳисобидаги мағлубиятга муносабат билдирди.
Англия клуби мазкур учрашувнинг биринчи бўлимини муваффақиятсиз ўтказиб, ўз дарвозасидан жавобсиз учта гол ўтказиб юборди.
Танаффусдан кейин Эрлинг Холанд икки марта рақиб дарвозасини ишғол қилиб, «шаҳарликлар»нинг ўйинга қайтишига умид уйғотди. Бироқ мезбонлар ҳисобни тенглаштира олмади ва якунда 2:4 ҳисобида мағлубиятга учради.
«Прессингда хатога йўл қўйдик»
Семеньонинг таъкидлашича, биринчи бўлимда прессингнинг нотўғри ташкил этилгани жамоа учун қимматга тушган.
«ПСЖ» Чемпионлар лигасида бежиз ғолиб бўлмаган.
Биз прессингни нотўғри ташкил этдик ва бунинг жазосини олдик. Иккинчи бўлимда эса ушбу муаммони бартараф этишга муваффақ бўлдик.
Рақиб дарвозаси олдида совуққонроқ ҳаракат қилишимиз керак. Агар яратган имкониятларимиздан унумли фойдаланганимизда, ҳаммаси бошқача бўлиши мумкин эди», — дея Семеньонинг сўзларини келтиради УЕФА расмий сайти.
Чемпионлар лигасидаги вазият
Мазкур мағлубиятдан кейин «Манчестер Сити» Европа Чемпионлар лигаси умумий босқичининг дастлабки икки турида уч очко жамғарган ҳолда қолди.
«ПСЖ» эса кетма-кет иккинчи ғалабасини қўлга киритиб, очколари сонини олтитага етказди.
