Европа футбол ассоциациялари иттифоқи (УЕФА) Халқаро футбол федерацияси (ФИФА)дан ташкилот бошқаруви ва айрим қарорларнинг қабул қилиниши билан боғлиқ масалалар юзасидан расмий тушунтириш беришни талаб қилди.
BBC Sport нашрининг хабар беришича, ФИФАга зарур ҳужжатларни тақдим этиш ва саволларга жавоб қайтариш учун 2 ноябргача муҳлат берилган.
Саккиз саҳифадан иборат эълон қилинган материалда бир қатор баҳсли масалалар кўтарилган. Улар орасида FIFA Forward Enterprise (FFE) лойиҳасига хусусий инвестициялар жалб этилиши, ФИФАнинг тинчлик мукофоти ҳамда АҚШ терма жамоаси ҳужумчиси Фоларин Балогуннинг сўнгги жаҳон чемпионатида шартли равишда дисквалификация қилиниши билан боғлиқ қарорлар бор.
ФИФА кенгашининг пайшанба куни ўтказилган йиғилишида ташкилот президенти Жанни Инфантино жаҳон чемпионатидан тижорий мақсадларда фойдаланиш режаси учун узр сўраган. Бироқ мазкур ташаббус қандай ишлаб чиқилганига тўлиқ ойдинлик киритмаган.
УЕФА раҳбарияти бу масалаларга ҳозирнинг ўзида жавоб берилиши шартлигини таъкидламоқда. Европа футболи мутасаддиларига кўра, тушунтиришларни ФИФА кенгашининг навбатдаги йиғилишигача кечиктириш мумкин эмас.
Шунингдек, келажакда амалга ошириладиган ислоҳотлар аввал қабул қилинган қарорларни текшириш ва улар учун жавобгарлик масаласини ҳал этиш ўрнини боса олмаслиги қайд этилган.
Ҳозирча ФИФА белгиланган муддатда талабларни бажармаса, УЕФА қандай чоралар кўриши маълум қилинмаган.
