Испаниянинг "Валенсия" клубида мулкдорлар таркиби билан боғлиқ муҳим ўзгаришлар юз бермоқда. Узоқ йиллардан буён мухлислар танқиди остида келаётган Питер Лим клубдаги улушининг бир қисмини бошқа инвесторга ўтказишга келишиб олди.
derbyderbyderby.it нашрининг хабар беришича, "Валенсия" расмий баёнот орқали клубнинг асосий акциядори Meriton Holdings ва Pitchwise Holdings компаниялари ўртасида келишувга эришилганини маълум қилди.
Келишув шартларига мувофиқ, Pitchwise Holdings "Валенсия" акцияларининг 42 фоизини сотиб олади. Шунингдек, янги инвестор клуб капиталига 100 миллион евро киритади.
Битим параметрларидан келиб чиқиб, "Валенсия"нинг умумий қиймати 1,25 миллиард еврога баҳоланмоқда.
Мазкур келишув Питер Лимнинг клуб устидан назорати тўлиқ якунланганини англатмайди. Бироқ бу унинг "Валенсия"даги таъсири камайиши йўлидаги дастлабки муҳим қадам сифатида баҳоланмоқда.
Қайд этиш жоиз, сўнгги йилларда "Валенсия" ўз тарихидаги энг оғир даврлардан бирини бошдан кечирмоқда. Клубнинг молиявий ва спорт соҳасидаги муаммолари мухлислар орасида норозиликларга сабаб бўлган.
"Кўршапалаклар"нинг сўнгги катта муваффақиятлари 2018/2019 йилги мавсумга тўғри келади.
Ўшанда Марселино бошчилигидаги "Валенсия" Испания чемпионатини тўртинчи ўринда якунлаган ва Қирол кубоги финалида "Барселона"ни мағлуб этиб, бош совринни қўлга киритган эди.
Эндиликда янги инвесторнинг пайдо бўлиши клубда ижобий ўзгаришлар бошланишига умид уйғотмоқда.
