"Милан" дарвозабони Майк Меньян Европа лигасида "Борнмут"га қарши учрашувдаги ҳаракати учун бир ўйинлик дисквалификациядан оғирроқ жазога тортилиши мумкин.
Франциялик посбон пайшанба куни ўтказилган баҳснинг 25-дақиқасида рақиб футболчисининг юзига зарба бергани учун қизил карточка олиб, майдондан четлатилган эди.
Меньян 5 ноябрь, пайшанба куни "Ференцварош"га қарши бўлиб ўтадиган Европа лигаси учрашувини аниқ ўтказиб юборади. Бироқ унинг жазоси шу билан чекланмаслиги мумкин.
pianetamilan.it нашрининг хабар беришича, УЕФА интизом регламентининг 15-моддасига кўра, қўпол ўйин учун икки учрашувга, тажовузкор ҳаракат сифатида баҳоланган қоидабузарлик учун эса уч учрашувга дисквалификация белгиланиши мумкин.
Шу сабабли Меньянга нисбатан қўлланиладиган жазо воқеанинг қандай баҳоланишига боғлиқ бўлади.
Бунда учрашув ҳаками томонидан расмий қайдномага киритилган маълумотлар муҳим аҳамият касб этади. Манбага кўра, дарвозабоннинг ҳаракати тажовузкор хулқ-атвор сифатида қайд этилиши эҳтимоли юқори.
Агар УЕФА мазкур ҳолатни шундай баҳоласа, "Милан" посбони учта учрашувга четлатилиши мумкин.
Ҳозирча интизомий жазо муддати бўйича якуний қарор қабул қилинмаган. Меньяннинг нечта ўйинни ўтказиб юбориши УЕФАнинг расмий хулосасидан кейин маълум бўлади.
