Бразилия чемпионатининг 32-туридан ўрин олган «Сантос» ва «Баия» жамоалари ўртасидаги учрашувда (1:1) «Сантос» ҳужумчиси Неймар майдондан четлатилди.

«Барселона»нинг собиқ футболчиси «Баия» вакили Родриго Нестор билан гаплашаётганда оғзини кафт билан тўсиб олган. Нестор бу ҳолатдан норози бўлиб, ҳакамга шикоят қилган. Натижада Неймар майдондан четлатилган. Қайд этилишича, футбол майдонида оғизни тўсган ҳолда шу тарзда мулоқот қилиш тақиқланган.

Учрашув 1:1 ҳисобида якунланди. 39-дақиқада Жуба «Баия»ни ҳисобда олдинга олиб чиққан бўлса, 46-дақиқада Неймар майдондан четлатилди. 90+3-дақиқада Перес «Сантос»га дурангни тақдим этди.

Учрашувдан кейин Неймар юз берган воқеа ҳақида ўз фикрини билдирди.

«Несторнинг бугун менга нисбатан қилган ишини жуда жиддий деб ҳисоблайман. Нима учун? Чунки бу ирқчиликка қарши курашиш учун яратилган қонун. У эса мен оғзимни қўлим билан тўсганимдан фойдаланиб, ҳатто унга ҳеч нарса демаган бўлсам ҳам, вазиятдан ўз манфаати йўлида фойдаланишга қарор қилди.

Албатта, биз бир-биримизни ҳақорат қилдик, ўзаро кесатиқлар қилдик. Бу футболнинг бир қисми ва одатий ҳолат. Аммо унинг қилган иши жуда жиддий.

Агар бу ирқчиликка қарши курашиш учун яратилган қонун бўлса, у қандай қилиб бундай ишга қўл уриши мумкин? Бу ақлга сиғмайди. Юз берган воқеадан жуда хафаман, чунки бу жуда пасткашлик бўлди», — дея Неймарнинг сўзларини келтиради UOL нашри.