“Барселона” клуби президенти Жоан Лапорта Испания Ла Лигаси раҳбари Хавьер Тебасни “Реал Мадрид” билан юзага келган зиддиятда қўллаб-қувватлади. Лапортанинг таъкидлашича, пойтахт клуби ўзининг бу ҳаракатлари билан бутун чемпионат ва ҳакамлик тизимига путур етказишга уринмоқда.

“Эл-Класико" ҳақида гаплашишга ҳали вақтимиз бўлади. Аммо шуни айтмоқчиманки, Ла Лига президенти айнан Хавьер Тебас эканлиги ҳаммамизнинг омадимиз, чунки унда масалаларни ҳал қилиш учун керакли тажриба бор. Қолаверса, у “Реал”нинг Ла Лигага нисбатан ўтказаётган босимларига дош бера олади. Кўринишидан, улар ҳаммасини йўқ қилмоқчи: Ла Лигани ҳам, ҳакамлар техник қўмитасини ҳам. Шунингдек, улар федерациядан ҳам, умуман ҳеч нарсадан рози эмаслар”, дея Лапортанинг сўзларини келтиради Mundo Deportivo нашри.

Эслатиб ўтамиз, 20 сентябрь куни “Реал” сафарда “Атлетико”га 1:2 ҳисобида имкониятни бой бергач, жамоа ва “Реалмадрид TV” клуб телеканали учрашув ҳакамларини кескин танқид қилган эди. Хавьер Тебас эса бу ҳолатни ҳакамларга нисбатан адолатсиз босим деб атади ва жамоага қарши қандайдир фитна борлигини мутлақо рад этди. Шунингдек, у телеканал услубини нацистлар Германияси ташвиқот вазири Йозеф Геббелс методларига қиёслаб, гап “Реал” мухлислари ёки жамоа ғояси ҳақида эмас, балки айнан пропоганда ҳақида кетаётганини очиқ айтди.

Бунга жавобан “Реал Мадрид” баёнот билан чиқиб, Тебаснинг дарҳол Ла Лига президенти ҳамда Испания қироллик футбол федерацияси (RFEF) вице-президенти лавозимларидан истеъфога чиқишини қатъий талаб қилди. Клуб раҳбарияти Тебаснинг бу қиёсини мутлақо номақбул ва ҳақоратли деб атади ҳамда унинг қўшимча тушунтиришлари сўзларининг асл моҳиятини юмшата олмаслигини таъкидлади.

Маълумот учун, айни пайтда “Реал” Испания Ла Лигасида 21 очко билан 3-ўринни эгаллаб турибди. “Қироллик клуби” етакчи “Барселона”дан 6 очкога ортда қолмоқда.