Мадриднинг «Реал» клуби Ла Лиганинг 11-турида «Расинг» меҳмони бўлади. «Барселона» устидан қозонилган ғалабадан кейин Жозе Моуриньо шогирдларини осон бўлмаган синов кутмоқда.

Гап шундаки, «Расинг» жорий мавсумда ўз майдонида ҳали мағлубиятга учрамаган. Жамоа «Эль Сардинеро»даги бешта учрашувда уч марта ғалаба қозониб, икки бор дуранг ўйнаган. Қизиғи, сантандерликлар 11 очкосининг барчасини уйда тўплаган, сафардаги бешта баҳсда эса мағлуб бўлган.

«Расинг» ўз майдонида 11 та гол урган, бироқ ҳимояда жиддий муаммоларга эга. Жамоа 10 турда 26 та гол ўтказиб юборган ва ҳали бирор марта дарвозаси дахлсизлигини сақлай олмаган.

«Реал» ҳам сафарда барқарор ўйнамаяпти. Мадридликлар меҳмондаги бешта учрашувнинг учтасида ғалаба қозониб, иккитасида ютқазган. Қолаверса, ҳар бир сафар ўйинида камида битта гол ўтказиб юборган.

Жамоалар сўнгги марта 2011 йил сентябрида «Эль Сардинеро»да тўқнаш келган ва ўша баҳс 0:0 ҳисобида якунланган. Ўшанда ҳам «Реал»ни Жозе Моуриньо бошқарган.