Халқаро шахмат федерацияси 2026 йил ноябрь ойи учун янгиланган рейтингни эълон қилди.
Халқаро шахмат федерацияси (FIDE) 2026 йил ноябрь ойи учун янгиланган рейтингни эълон қилди. Ушбу рўйхатдан Ўзбекистоннинг беш нафар гроссмейстери кучли 100 таликдан жой олди.
Рейтингда ҳамон Магнус Карлсен (2823) пешқадамлик қилмоқда. Иккинчи ва учинчи ўринларни АҚШ вакиллари Хикару Накамура (2792) ҳамда Фабиано Каруана (2783) эгаллаб турибди. Ўзбекистоннинг биринчи рақамли шахматчиси Жавоҳир Синдаров 2782 очко билан жаҳон рейтингида тўртинчи ўринни банд этган. Нодирбек Абдусатторов эса 2772 очко билан бешинчи ўринни эгаллади.
Кучли 100 таликдан яна уч нафар ўзбекистонлик гроссмейстер жой олди:
-
Нодирбек Ёқуббоев — 2701 очко (31-ўрин);
-
Рустам Қосимжонов — 2655 очко (61-ўрин);
-
Шамсиддин Воҳидов — 2627 очко (95-ўрин).
Аёллар ўртасидаги топ-100 рейтингидан ҳам икки нафар ўзбекистонлик шахматчи жой олди. Афруза Ҳамдамова 2447 очко билан 25-ўринни эгаллаган бўлса, Гулруҳбегим Тоҳиржонова 2349 очко билан 89-поғонадан жой олди. Аёллар рейтингида Хитой вакиллари етакчилик қилмоқда. Хоу Ифань 2596 очко билан биринчи, Жу Жинер 2559 очко билан иккинчи, Сюй Вэньцзюнь эса 2553 очко билан учинчи ўринда қайд этилган.
Шунингдек, Ўзбекистон шахмат федерацияси дунёнинг энг кучли шахмат федерациялари рейтингида ўртача 2631 очко билан еттинчи ўринни эгаллади.
