"Арсенал" бош мураббийи Микель Артета Англия чемпионатининг тўққизинчи турида "Ливерпуль" устидан қозонилган ғалабага муносабат билдирди. "Канонирлар" 14 йил ичида илк бор рақибни ўз майдонида мағлуб этди — 1:0.
"Мен жуда катта фахр туйғусини ҳис қиляпман. Орадан 14 йил ўтди — бу жуда узоқ вақт. Ишончим комилки, бугун биз клубга алоқадор бўлган барча инсонларга улкан фахр туйғусини ҳис қилиш учун сабаб бердик. Бу нафақат ғалабанинг ўзи, балки унга қандай эришганимиз ва намойиш этган жамоавий руҳимиз билан ҳам боғлиқ. Айниқса, тўрт кун олдинги воқеаларни ҳисобга олсак. Ўшанда биз мағлуб бўлдик ва аслида ютишимиз шарт бўлган жамоага ютқазиб, кубок мусобақасини тарк этдик", — дея Артета сўзларини келтиради BBC.
"Футболнинг сеҳри ҳам шунда: у сени жуда оғир вазиятга солиб қўйиши мумкин, аммо атиги тўрт кундан кейин сенда ҳақиқатан ҳам тарихий ишни амалга ошириш имконияти пайдо бўлади. Биз эса буни уддаладик".
"Арсенал" 24 очко билан мусобақа турнир жадвалида биринчи ўринни эгаллаб турибди.
