Фарғона вилояти ҳокими кубоги турнирининг 1-турида “Андижон” ёшлар жамоаси “Нефтчи-1”га мағлубиятга учрагани ҳақида хабар бериб ўтдик. Ана шу ўйиндан сўнг "Андижон" ёшлари бош мураббийи Нозим Муллаохунов ўйин тўғрисида ўз фикрини билдирди.

- “Андижон”нинг ёшлар жамоасига ўйинчиларни саралаб олиш мақсадида ушбу мусобақада қатнашишди лозим топдик. Кучли рақибларга қарши ўйинлар орқали ёшларнинг имкониятини текшириб оламиз. Бугун биринчи ўйинда “Нефтчи”нинг асосий таркибига қарши тўп сурдик. Албатта, “Нефтчи”нинг маҳорати барибир ўз сўзини айтди. Бундай қорли майдонда болалар нималарга қодир эканлигини кўрсатишлари мушкул. Шунга қарамай, шогирдларим кучли рақибга муносиб қаршилик кўрсатишга ҳаракат қилишди. Футболчиларим ёмон ўйнашгани йўқ. Бу шогирдларимни келажаги борлигига ишонаман.

Майдонда иккита бир хил рақамда футболчиларимиз тўп суришгани учун мухлислардан узр сўрайман. Вазият шуни тақозо этиб қолди. Аммо бошқа томондан олиб қараганда, “Нефтчи”да ҳам шундай ҳолат бўлди. Масалан, Клецковни футболкасида 15-рақам, шўртикида 1-рақам акс этганди. Лекин негадир фарғоналик ишқибозлар ёш футболчиларимизни камситишгани бизни бироз ранжитди. Энди кейинги ўйинларда яхши натижалар кўрсатишга ҳаракат қиламиз.