Олимпиаданинг биатлон мусобақасида биринчи бўлиб ўтказилган спринт мусобақасида омади чопмаган Дарья Домрачева, кейинги 3та стартнинг олтин медалларини ҳеч кимга бермади.
Бугун у энг кучли 30 нафар биатлончи иштирокида бўлиб ўтган масс-старт йўналишида ҳам финиш чизиғига биринчи бўлиб етиб келди. У дастлабки 3та ўқ отишда бирорта ҳам хато йўл қўймаган бўлса, сўнгги ўқ отишда битта нишонна ёпа олмади. Аммо бу ҳолат унинг учинчи марта олимпиада чемпионига айланишига халал бера олмади. Эътиборлиси, ҳозиргача Беларусь мамлакати эгалик қилаётган 4та олтин медалнинг 3тасини Домрачевага тегишли.
Ниҳоят, Габриела Соукалова ҳам олимпиаданинг медалига эга бўлди. Чехиялик спортчи ҳам ўқ отиш майдончаларида худди Домрачева каби натижа қайд этди. Тезлик бобида беларуслик рақибидан бироз ортда қолган Соукалова ўз мамлакатига кумуш медални тақдим этди.
Бронза медали учун курашда норвегиялик Тирил Экхофф германиялик Захебахерни 1 сонияга ортда қолдирди.
