"Локомотив" - "Насаф" жамоалари ўртасидаги ўйиндан кейинги матбуот анжуманининг иккинчи қисмида мезбонлар бош мураббийи Вадим Абрамов иштирок этди.

— Бугун мухлислар кутган ўйинни намойиш қила олмадик. Жамоанинг функционал ҳолати ҳозирча яхши ўйнашга имкон бермайди. Жамоанинг функционал ҳолатини яхшилаш устида машғулотларда иш олиб боряпмиз. Шунинг учун улар юклама остида ўйнашмоқда. "Насаф" яхши жамоа. Гол уриб олганимиздан кейин иккинчи бўлимда ҳисобни сақлаб қолиш учун ўйнадик. Шунинг учун иккинчи ҳужумчини майдондан олиб, ярим ҳимоячини туширдик. Олдимизга юқори вазифалар қўйилгани футболчиларга ортиқча босим юкламоқда ва улар ўз ўйинларини кўрсата олишмаяпти.

— Легионерларнинг ўйинлари сизга манзурми?
— Бугунги ўйинда ғалаба қозона олмаганимизга фақат легионерлар эмас, барчамиз айбдормиз. Жамоанинг ўйини чиқса, легионерларнинг ҳам ўйини очилади.

— Евгений Гоголь ҳаттоки 18таликка ҳам кирмаганининг асосий сабаби нимада?
— Қайси футболчи 18таликка кирмаган бўлса, демак, у ҳозирда бошқалардан кучсиз.

— Йигитлар ғалабага эрта ишониб юборишмадими?
— Йўқ, агар улар ғалабага ишонишганида, бундан хурсанд бўлардим, улар бошқачароқ ўйнаган бўлишарди. Ҳозирча футболчиларнинг ўзлари юксак вазифаларни бажара олишларига ишонишмаяпти.

— Биринчи даврадан кейин ҳам қайсидир футболчи жамоани тарк этадими?
— Футбол рақобатдан иборат. Бугунги ўйинимиз мухлисларга ёқмаган бўлиши мумкин. Кимдир келади, кимдир кетади. Жамоага мослашиб кетган футболчилар сафимизда қолаверишади. Яна 2-3 та ўйиндан кейин кўп нарса маълум бўлади. Ҳозирча эса ҳар бир ўйинда албатта ғалаба қозонишимиз кераклиги бизга халал бермоқда.

— Жамоанинг функционал ҳолати яхши эмас деганда, нимани назарда тутдингиз? Жисмоний ҳолатними ёки футболчиларнинг ўзаро тушунувчанлигиними?
— Бу бир-бирига боғлиқ бўлган нарса. Футболчига жисмоний жиҳатдан тайёр бўлмаса, шериклаини тушунишда ҳам муаммоларга дуч келади. Футболчи қачон югуриш, қачон дам олиш кераклиги билиши керак. Шунда жамоанинг ўйини яхши чиқади. Бугун эса биз амалда ҳеч нарса кўрсата олмадик.