Девис кубогининг Осиё/Океания минтақасида иштирок этаётган теннис бўйича Ўзбекистон терма жамоаси иккинчи босқичда Хитойга қарши баҳс олиб бораётганидан хабарингиз бор.
Мусобақанинг иккинчи кунида жуфтлик баҳслари ўтказилди. Денис Истомин ва Фаррух Дўстовдан иборат Ўзбекистон жуфтлиги хитойлик Гонг Мао Син / Ли Же жуфтлигини 3та сетда мағлуб этишди. Дастлабки сетда вакилларимиз 6:4 ҳисобида ғалаба қозонишган бўлса, иккинчи ва учинчи сет бир хил ҳисоб билан якунланди — 6:2, 6:2.
Шу тариқа терма жамоамиз 2:1 ҳисобида олдинга чиқиб олишди. Кеча бўлиб ўтган дастлабки кун ўйинларининг ҳар иккаласи 5 сет давом этиб, Истомин ғалаба қозонган бўлса, Дўстов мағлубиятга учраганди.
Ушбу икки теннисчимиз эртага яна яккалик баҳсларида кортга чиқишади. Битта ғалаба терма жамомизни кейинги босқичга олиб чиқади.
