Футзал бўйича Ўзбекистон миллий терма жамоаси бугун, 7 май куни Тошкент вақти билан соат 16:30да Осиё чемпионатининг чорак финал учрашувини ўтказади. Мазкур баҳсда Баҳодир Аҳмедов шогирдлари Ливан терма жамоасига қарши тўп суришади. Албатта, ўйиннинг аҳамияти ҳар иккала томон учун жуда муҳим, негаки, чорак финални ютган жамоа, камида мусобақанинг совриндорлари қаторига кириш учун имкониятни сақлаб қолади. Бундан ташқари эса, ярим финалга йўлланма олган мамлакат терма жамоаси шу йилнинг ўзида ўтказиладиган клублар ўртасидаги Осиё чемпионати йўлланмасини нақд қилиб қўяди.

Ливанга қарши бўлиб ўтадиган баҳсга миллий терма жамоамиз аъзолари жиддий эътибор қаратишмоқда. Бир кун олдин бўлиб ўтган машғулот чоғида мураббийлар штаби ўйиннинг кўплаб жиҳатларига урғу беришди. Футзалчилар прессинг қўллашни ва ҳимоядан тезкор ҳужумга ўтишга қаратилган машқларни бажаришди. Чорак финал плей-офф тизимида ўтказилишини инобатга олиб, мураббийлар пенальтиларни ҳам унутишмади.

Умуман олганда, терма жамоамиз тўғрисида гапирадиган бўлсак, жамоанинг ичидаги муҳит жуда яхши. Айнан аҳиллик ва иноқлик Баҳодир Аҳмедов шогирдларининг кучли томонларидан бири. Бу нарса ўзини нафақат ўйин жараёнида, балким кундалик ҳаётда ҳам акс эттириб келяпти.

Терма жамоамиз ичидаги илиқ муҳит, умид қиламизки, бугунги ўйинга ҳам ижобий таъсир қилади ва футзалчиларимиз аҳиллиги Ливанни мағлуб этишга ёрдам беради.