Ўзбекистон U-16 ўсмирлар терма жамоаси 9 июль куни Тошкентдаги «ЖАР» стадионида Уммон U-16 ўсмирлар терма жамоасига қарши ўртоқлик учрашувида майдонга тушди ва 2:0 ҳисобида ғалаба қозонди.

Айни кунларда Тошкентда ўзининг навбатдаги ўқув-машғулот йиғинини ўтказаётган Александр Мочинов бош мураббийлигидаги Ўзбекистон U-16 ўсмирлар терма жамоаси режага мувофиқ, бугун Тошкентда Уммон U-16 ўсмирлар терма жамоасига қарши илк ўртоқлик ўйинида майдонга тушди.

Қизиқарли кечган учрашувнинг ҳар бир бўлимда биттадан гол киритган Ўзбекистон U-16 ўсмирлари якунда 2:0 ҳисобида ғалаба қозонди. Ўйиндаги ҳар иккала голга Кенжабоев Ислом муаллифлик қилди. Дастлаб, ўйиннинг биринчи бўлими 35-дақиқасида Ислом Кенжабоев қантодан оширилган тўпни рақиб дарвозасига йўллаб ҳисобни очди. Иккинчи бўлимнинг 89-дақиқасида Кенжабоев қанотдан оширилган тўпни боши билан йўллаб, ҳисобни 2:0 кўринишига келтирди. Ушбу ҳисоб ўйин якунига қадар ўзгармади ва Мочинов шогирдлари илк ўйинда 2:0 ҳисобида ғалаба қозондилар.

Эслатиб ўтамиз, Ўзбекистон ва Уммон ўсмирлар терма жамоалари 11 июль, жума куни ўзаро иккинчи бор ўртоқлик учрашувида майдонга тушадилар. Учрашув соат 18:30да «ЖАР» стадионида бошланади.

Ўртоқлик учрашуви.
Тошкент, «ЖАР» стадиони. 9 июль.
Ўзбекистон U-16 – Уммон U-16 2:0
Голлар: Ислом Кенжабоев 35, 89.
Амалга оширилмаган пенальти: Суҳроб Нуруллоев (65).