Ҳозирча сўнгги бўлиб турган трансфер ойнасининг яна бир муҳим хариди, шак-шубҳасиз, Хавьер Эрнандесдир. Боиси, бошқа футболчилардан фарқли ўлароқ, ҳеч ким бу футболчининг “Реал”га ўтишини тахмин ҳам қилмаганди. Сабаби, Мадрид клубига жисмонан бақувват, ҳар бир вазиятни голга айлантира оладиган ҳужумчи зарур эди. Шу боис Хавьер Эрнандес (Чичарито)нинг сотиб олиниши бироз ажаблантирди. Аммо шуни ҳам таъкидлаш жоизки, бу мавсум “Реал” ҳужумчи сотиб олмайдими дея хавотирланиб турган мухлислар Чичаритонинг харидидан бироз таскин ҳам топишди.

“Ҳамма нарсага қодир футболчи йўқ”
“Айтиб ўтишни хоҳлардимки, мен “Реал” сафига ўтганимдан жуда хурсандман. Айниқса, клуб бош мураббийсининг мен билан таркибни кучайтирмоқчи эканлиги янада қувонарли. Менда янада кучли бўлиш учун жуда кўп имкониятлар бор. Яна шуни таъкидлашим керакки, дунёда ҳамма нарсага қодир бирорта футболчи йўқ. Агар кимдир шундай ҳисобласа, у ухлаб ётибди ёки гаплари ёлғон. У гапини исботлаб бера олмайди. Худди шунингдек, мен ҳам, қанча имконият яратилмасин, ҳар нарсага қодир футболчи бўла олмайман. Лекин қўлимдан келганча ҳаракат қиламан”.

“Клуб учун ҳеч нарсани аямайман”
“Мен энди Мадриддаман ва ёрдамим кераклигини ҳис қиляпман, бу менга куч бағишлайди. Мен ҳар доим ҳамма нарсага қийинчилик билан эришишга одатланганман, умуман, бу эркак кишига хос хусусият. Мен ҳозир бутун мавсум учун куч тўплаяпман. Бу кучимни эса Мадрид клубининг ғалабалари ва мукофотларга эришиши учун сарфлайман”.

“Бу ҳузурбахш орзу”
“Бу орзу, ҳақиқатга айланган орзу. Дунёда бундай рўёбдан қувонмайдиган футболчининг ўзи йўқ. Агар кимдир “Мен “Реал”га ўтишни истамайман”, деса, унга ишонманг. Бу каби эртакнамо ҳақиқат ҳар кимни қувонтириши табиий. Яна шуни айтишим мумкинки, Мексика термаси ва “Манчестер Юнайтед”да тўп сурганимда ҳам шундай туйғуни ҳис қилгандим. Мен учун “МЮ” ва “Реал” — тенг кучли жамоалар. Уларнинг бирортасини устун қўя олмайман.

“Ҳаммада ҳам иккита оёқ ва иккита кўз бор”
“Нега фақат лотин америкалик футболчиларни харид қилишади? Билмадим. Ахир ҳаммада ҳам иккита оёқ ва иккита кўз бор. Ўзимдан келиб чиқиб айтадиган бўлсам, мен ҳеч қачон орзумдан қайтмайман. Ҳозир ва ҳар доим фақат футбол ҳақида гапираман. Ҳар доим олға интиламан. Мен ҳозир “Реал”да ўйнаяпман — бу мен учун фахр-ифтихор.”.

“Мени қўллаб-қувватлаганларни ранжитмайман”
“Мени қўллаб-қувватлаган мухлисларни ранжитмасликка ҳаракат қиламан. Мен “Реал”даман, бу клубнинг мухлислари эса фақат ва фақат ғалабани хоҳлашади, демак, мен голлар уришга мажбурман. Ҳамма Чичаритони майдонда тезроқ кўришни хоҳлайди, мен эса юқори даражада ўйнашга интиламан. Мен “Реал”га ўтдимми, янада яхшироқ ўйнашга мажбурман”.

“Ўтган мавсумда омадсизликка учраган фақат мен эмас”
"Ўтган мавсум “Манчестер Юнайтед” футболчилари учун омадсиз ўтди. Бунга фақат мен эмас, барча футболчилар айбдор. Футболчилар ўз устиларида у қадар ишлашмади. “Реал”да эса ўзгача муҳит, бор имконингизни ишга солишингиз учун ҳамма нарса етарли, ўйинчиларнинг ҳам шаштлари баланд. Улар янги марраларни кўзлашяпти”.

“Натижаларимни ҳисоблаб бормайман”
“Мен қанча гол урганимни ҳисоблаб бормайман. Голлар — майдон бўйлаб амалга оширилган ҳужумларнинг муваффақиятли якуни, холос. Ҳа, ҳужумчилар дарвозабонни ожиз қолдиришлари шарт, бу лаҳзаларни кўплаб ишқибозлар ёдда сақлаб қолишади, ғалабалар мухлислар хотирасидан абадий жой олади. Менинг таҳлил қиладиганим — позициям. Мен майдонда ҳаракатланиш психологиясини ўрганиб олганман, майдонда сидқидилдан, бор кучимни ишга солиб ҳаракат қиламан, аммо ҳар қандай босимни ўзимдан соқит қила оламан. Мен “қаймоқранг” футболка ғалабалар сари етаклаши зарурлигини тушунаман”.

“Ҳаёт алмашинувлардан иборат”
“Мен ҳамма нарсага профессионал ва мантиқий ёндашаман. Агар мени Бенземага алмаштиришни тўғри деб топишса, эътирозим йўқ”.
— Майдонда мухлисларга қандай Чичарито кўринади?
— Мен кўплаб камчиликларимни бартараф этишга ҳаракат қиламан. Тўғри, ҳаётда мукаммал инсоннинг ўзи йўқ, аммо, барибир, мукаммалликка интилиш лозим. Кичик хатоларни ҳам тузатиб, ҳаракат қилишда давом этиш керак. Мен майдонда худди шу ақидага амал қиламан. Ишонинг, сиз кўп нарсага қодир Чичаритони кўрасиз”.

Премьер-лигадан Ла Лигага мослашган осонми ёки тескарисими?
— Англияга келганимда ўйнаб кета олишимга шубҳа қилгандим. Лекин ҳаммаси яхши бўлди. Ҳозир эса аввалгидан тажрибам кўпроқ. Агар барча имкониятимни ишга солсам ва жамоадошларим ёрдам беришса, Испанияда ҳам ҳаммаси жойида бўлади.

“Узоқ муддатли режа тузаман”
“Мен ҳар доим айтаман, режамни узоқ муддатга тузаман. “Манчестер Юнайтед” мени сотиб олганида бир кун келиб Мадридга ўтишим ва дебют учрашувимни “Атлетико”га қарши ўтказишим хаёлимга ҳам келмаганди. Бугунги замонавий футболда ҳар бир жамоа катта бир таркибга эга бўлишни хоҳлайди, мен ҳам ана шундай клубнинг ажралмас бир қисмига айландим”.

“Буни англияда ҳам сўрашган”
“Ёқтирган жамоам — “Реал Мадрид”. Буни Англияда ўйнаб юрган пайтимда ҳам сўрашган. Ҳатто Мексика чемпионатида ҳам Ла Лига, хусусан, буюк тарихга эга бўлган “Реал”га тақлид қилишади. Мен яна бир бор такрорлайман, бу жамоа учун боримни беришга тайёрман.