Испаниянинг «Атлетико Мадрид» жамоаси сардори Габи Испания чемпионатининг 2010/2011 йилги мавсумида «Сарагоса» таркибида ўйнаётган вақтида «Леванте»га қарши баҳс келишилганини тан олди. Бу ҳақда Испаниянинг El Mundo нашри хабар бермоқда.
2011 йилнинг май ойида бўлиб ўтган ва Испания чемпионатининг сўнгги туридан ўрин олган ушбу баҳсда «Сарагоса» сафарда «Леванте»ни 2:1 ҳисобида мағлуб этиб, иккинчи дивизионга тушиб кетиш хавфидан қутилиб қолган. Ўйиндаги «Сарагоса»нинг ҳар иккала голига Габи муаллифлик қилган.
Аввалроқ Испания прокуратураси ушбу учрашувда иштирок этган 20 нафар футболчини сўроқ қилганди. Натижада Габи ва унинг адвокатлари ўйин келишилган руҳда ўтгани ҳақидаги айбловларни тан олиб, терговга ёрдам беришга рози бўлишганди.
Футболчига қандай жазо қўлланилиши мумкинлиги ҳақида ҳозирча ҳеч қандай ахборот берилмаяпти. Гумонланувчилар рўйхатида «Атлетико» сардоридан бошқа яна қайси футболчилар борлиги ҳам ҳозирча маълум эмас.