"Барселона" клуби Испания чемпионатининг 7-тури доирасида "Райо Вальекано" меҳмони бўлди ва сафардан 3 очко билан қайтадиган бўлди.

Мезбонлар кучли рақибга қарши чуқур ҳимоя ёки "автобус" қўйишмади, аксинча очиқ ўйин таклиф қилишди. Бунинг оқибатида жазоланишди. Улар ўз дарвозаларидан 2та тўп ўтказиб юбориш билан биргаликда икки нафар мезбон ўйинчиси майдондан четлатилди.

Каталонияликлар ўзларининг иккита голини 1 дақиқа ичида киритишди. Пикенинг узатмасидан кейин Месси дарвозабон билан бирга-бир вазиятга чиқиб, ҳисобни очган бўлса, Неймар ҳам шунга ўхшаш вазиятда дарвозани ишғол қилди.

"Барселона" мавсум бошланганидан бери кетма-кет 7та ўйинда ўз дарвозасидан гол ўтказиб юбормаяпти. Жамоа посбони Клаудио Браво мавсум стартида "қуруқ" ўйинлар борасида рекордни янгилашга эришди. Ушбу рекорд Педро Артолига тегишли бўлиб, чемпионат стартида 560 дақиқали "қуруқ" серия 37 йил мобайнида янгиланмай келинаётганди.

"Барселона" бу баҳсда ҳам йирик ҳисообда ғалаба қозониши мумкин эди. Мунир бир марта, Месси эса 3-4та марта бирга-бир вазиятларда дарвозани ишғол қила олишмади.

Ушбу ғалабадан кейин Энрике шогирдлари пешқадамлик қилишда давом этадиган бўлишди.

Райо Вальекано – Барселона 0:2 (0:2, 0:0)
Голлар: 0:1 – 35 Месси, 0:2 – 36 Неймар.
Райо Вальекано – Тоньо, Тито, Морсильо, Абдулайе (Манушу, 46), Инсуа, Баена, Трашоррас (Хосабед, 74), Буэно, Лика (Акино, 46), Какута, Лео Баптистао.
Барселона – Браво, Дани Алвес, Бартра, Пике, Матье, Хави, Бускетс, Иньеста (Ракитич, 69), Неймар (С.Рамирес, 80), Мунир (Педро, 59), Месси.
Огоҳлантиришлар: Хави (10), Абдулайе (18), Трашоррас (33), Морсильо (37), Акино (63), Пике (72).
Четлатишлар: Морсильо (60), Акино (90).