БААнинг Дубай шаҳрида бўлиб ўтаётган пляж футболи бўйича Қитъалараро Кубок мусобақаларида бугун ярим финал учрашувлари бўлиб ўтади. Эътиборлиси, қитъанинг энг кучли терма жамоалари иштирокидаги мазкур мусобақада пляж футболи бўйича ўзбекистонлик ФИФА рефериси Бахтиёр Намозов ҳакамлик қилмоқда.
Ўзбекистонлик ҳакам бугун Португалия ҳамда Бразилия терма жамоалари ўртасидаги ярим финал баҳсида бош ҳакам вазифасини бажаради. Иккинчи ярим финал баҳсида Эрон ва Россия терма жамоалари ўзаро кучи синашадилар. Мусобақанинг финал учрашуви эса 8 ноябрь куни бўлиб ўтади.
Маълумот ўрнида, Бахтиёр Намозов ушбу мусобақада бунгача гуруҳ босқичида Эрон - Португалия (бош ҳакам) ва Япония - Россия (захира ҳаками) учрашувларида ҳакамлик қилди.
Барча қитъанинг энг кучли терма жамоалари иштирокида ҳар йили анъанавий тарзда ўтказиладиган мазкур турнирга бу йили БААнинг Дубай шаҳри мезбонлик қилмоқда. Бу йилги турнирда барча қитъаларнинг энг кучли терма жамоалари саналган жами 8та терма жамоа ғолиблик учун кураш олиб боради - Россия (жаҳон ва европа чемпиони), Португалия (европа вице-чемпиони), Бразилия (жаҳон вице-чемпиони, Конмебол чемпиони), АҚШ (Конкакаф чемпиони), Марокаш (Африка чемпиони), Эрон (Осиё Чемпиони), Япония (Осиё вице-чемпиони) ва БАА (мезбон).
Эслатиб ўтамиз, Бахтиёр Намозов пляж футболи бўйича ўзбекистонлик ягона ФИФА рефериси ҳисобланади.
