Футбол азалдан ҳақиқий эркаклар ўйини экани аён. Лекин охирги вақтларда аёллар ҳам футбол оламида ўз ўринларини топиб боришмоқда. Европанинг бир қатор чемпионатларида аёл ҳакамлар ўйинларга қўйилиши жорий қилинган. Баъзи жамоаларда раҳбарлик лавозимларида иккинчи жинс вакилаларини кўришимиз мумкин. Ушбу мақоламизда айни пайтда жаҳон футболига кўзга кўринарли таъсир ўтказган аёллар хусусида баён қиламиз.
Ева Карнейро
Андре Виллаш-Боаш "Челси" жамоаси учун битта яхши иш қилиб кетган. Айнан у ушбу мафтункор шифокор қизни жамоага ишга олган эди. Ева миттигина Гибральтар портида туғилиб ўсган, болалигида балет билан шуғулланган, улғайгач, бошқа соҳани танлаб, Лондонга тиббиёт бўйича билим олишга келган эди. Таҳсилни тугатгач, "аристократлар" жамоасида фаолият бошлади ва шу ерда оламжаҳон машҳурликка эришди.
Уни танийдиганлар унинг жуда чиройли эканини ҳам тан олишади. У биринчи эди. Яъни, Ева "Челси" каби катта жамоаларнинг футболчиларига тиббий ёрдам кўрсатиш учун майдонга тушиб келадиган илк аёл ходим бўлди.
Аввалига унга бироз қийин бўлди. У ҳақида ҳар ким турли ғийбатлар тўқиб чиқаришни бошлайди, у билан боғлиқ ҳолатни анъаналарнинг бузилиши сифатида қабул қилганлар ҳам бўлди. Уни футболчиларнинг эътиборини чалғитишда ҳам айблардилар. Лекин, Ева ўз соҳасидаги чуқур билимлари эвазига барча танқидларга муносиб жавоб берарди. У эндиликда жамоанинг имижларидан бирига айланган. Энди бошқа кўплаб жамоаларда ҳам "Ева тажрибаси" қўлланмоқда ва "Милан", "Вильяреал" сингари жамоаларда ҳам у каби гўзал шифокорлар иш олиб бораётганини кўрамиз.
Барбара Берлускони
Машҳур магнат ва "Милан" жамоаси президенти Сильвио Берлускони ўз ишларини давом эттирувчи ворис сифатида Барбарани танлаган. Бу қизни Италияда "Леди Б" деб ҳам аташади.
2011 йилда Барбара Берлускони "Милан" жамоасининг директорлар кенгаши таркибига киради. Лекин, илк кунларданоқ президент қизи ва жамоанинг кўп йиллик бошқарувчиларидан бири Адриано Галлиани ўртасида ихтилоф келиб чиқади. Барбара ўзининг иқтисодиёт факультетида олган билимларини амалга тадбиқ этиш учун янги лойиҳалар билан кириб келганди жамоага. У Галлианининг иш услубидан бир қанча хатолар топади ва уни қаттиқ танқид қилади. Галлиани кетиш ҳақида ариза ҳам ёзади, бироқ, Сильвио Берлускони бу аризани қабул қилмасдан, томонларни муросаага келтиради. Эндиликда, Галлиани спорт ишлари директори бўлса, Барбарага маркетинг ва иқтисодиёт масалари бўйича масул лавозим топширилган.
Маргарита Луи-Дрейфус
Санкт-Петербурглик Маргарита Богданова Париждан Нью-Йоркка парвоз қилаётган самолётда француз миллиардери Роберт Луи-Дрейфус билан ёнма-ён ўтириб қолади ва улар ўртасида муҳаббат пайдо бўлиб, бу муҳаббат уларнинг никоҳи билан якунланади. Роберт улкан компания эгаси бўлиш қаторида, футбол мухлиси ҳам эди. У ўтган асрнинг 90-йиллари ўрталарида инқирозга юз тутган "Олимпик Марсель"га сармоя киритиб, жамоани банкротликдан сақлаб қолган эди. Миллиардер 2009 йилда хасталик туфайли вафот этади ва барча мол-мулкини, жумладан "Марсель" раҳбарлигини ҳам рафиқасига мерос қилиб қолдиради.
Маргарита хоним ўша йилдаёқ 17 йилдан бери ютуқсиз қолаётган жамоа билан Франция чемпионлиги ва Лига Кубогини қўлга киритади. Ўшандан бери у жамоани муваффақият билан бошқариб келмоқда. Ҳукумат солиқларни йилдан-йилга оширади, шаҳар мери ҳар ойда "Велодром" стадиони ижарасини талаб қилади, у эса барча машаққатларга чидаб, жамоани бошқаришда давом этади. Айни кунларда ҳам унинг раҳбарлигидаги "Марсель" чемпионатда яққол пешқадам бўлиб турибди.
Корин Дьякр
Шу йилнинг май ойида Франция 2-дивизионида иштирок этувчи "Клермон" жамоасида оламшумул иш содир бўлди. Жамоа жаҳон тарихида илк бор аёл киши мураббийлигида ҳаракат қилган жамоага айланди – Элена Кошта исмли мутахассис эркак футболчиларга футбол ўйнаш учун кўрсатма бера бошлади. Кўпчилик бу ҳодисани пиар юриши деб атади, кимдир буни гендер ташкилотлари уюштирган инқилоб деб атади, хуллас ҳечким бу мураббийнинг муваффақиятига ишонч билдирмади. натижада шундай бўлди ҳам, Элена ёздаёқ ўз ўрнини бўшатиб қўйди. Лекин кимга? Унинг ўрнида рнди бошқа бир аёл мураббий пайдо бўлади. Франция аёллар терма жамоасининг собиқ ўйинчиси ва сардори Корин Дьякр ҳеч иккиланмасдан шу ишга киришади.
Уни биринчи ўйинида бутун стадион ўрнидан турган ҳолда олқишлаб кутиб олади, рақиб жамоа мураббийи эса унга аталган гулдаста билан келади. Ҳозирда жамоа унинг бошқаруви остида бирқанча ғалабаларга эришган ва турнир жадвали ўрта қисмида кетмоқда. "Клермон" Франция кубоги доирасидаги 2 та босқичдан ҳам ўтди ва яқин кунларда олий лига жамоаси билан беллашади.
Сара Карбонеро
Сара Карбонерони анчадан бери Икер Касильяснинг қайлиғи сифатида танишади. Лекин у, 2010 йили ЖАР да ўтган жаҳон чемпионати вақтида янада машҳур бўлиб кетганди. Уни Испания терма жамоаси Швейцария билан учрашган ўйинда трибунада ўтириб, дарвозабонни чалғитганликда ва жамоанинг мағлубиятига сабаб бўлганликда айблаб чиқишади. Бу воқеадан кейин у интернет ва бошқа ахборот воситаларида энг кўп тилга олинган инсонга айланади. Лекин, Касильяс кейинги ўйинларни ишончли ўтказади ва Саранинг "айби" эсдан чиқарилади.
Сара Икер Касильяс билан ундан интервью олиш чоғида танишиб қолган. Унинг футбол журналистикасида ҳам ўзига хос ўрни бор, “Сара Telecinco” телеканалида ҳар куни футбол дастури билан чиқиш қилади. У кўрсатувга муаллифлик қилиш баробарида, ўзининг футбол борасида мутахассисларча фикрлаши билан алоҳида ҳурматга сазовор.
Ҳозирда бу икки жуфтлик турмуш қуришган ва Мартин Касильяс-Карбонерони тарбиялашмоқда.
Бибиана Штайнхаус
"Шахтёр" бош мураббийи Мирча Луческу Украина чемпионатидаги бир ўйинда қанот ҳаками вазифасида ҳаракат қилган Наталья Ратчинскаянинг ҳаракатларидан норози бўлиб, аёлларни умуман бу соҳага яқин йўлатмаслик кераклиги, уларнинг кўнгилчанлиги адолатли қарор чиқаришда тўсқинлик қилиши ҳақида гапирган эди. Лекин, германиялик Бибиана Штайнхаус руминиялик бу мутахассиснинг хулосаси хато эканини кўрсатиб берди.
Бибиана 10 йилдан бери, яъни 16 ёшидан бери ҳакамлик соҳасида ишлаб келади. Аввалига аёллар футболида фаолият кўрсатган бу ҳакам 2 йил олдин катта футболда ўзини синашга аҳд қилди ва ўзини муносиб равишда кўрсатди. У Германия чемпионатининг асосий ўйинларида ҳам юқори савияда ҳакамлик қилиб келмоқда ва ҳеч қандай муаммога дуч келаётгани йўқ.
Карин Азар
Карин Азар 4 нафар ўғилнинг онаси. У 26 ёшигача, 3 чи фарзанди Киллианга ҳомиладор бўлгунича футбол ўйнади. Эден ва Тьерри Азарга ҳужумкорлик хусусиятлари айнан ундан ўтган. У ўз футболчилик фаолияти давомида Бельгия аёллар футболидаги барча дарвозабонларга гол уриб чиққан.
У жаҳон футболига жуда катта хизмат қилди. Катта ўғли Эден Азарсиз бугунги футболни тасаввур қилиб бўлмайди. Иккинчи фарзанди Тьерри ҳам "Челси" аъзоси ҳисобланади. Ёш Киллиан Азар эса ҳозирча "Зюльте-Варегам"да тажриба тўпламоқда. Азарлар оиласининг энг кенжа аъзоси ҳали 11 ёшда, лекин онаси ва акалари унинг ҳам футболчи бўлишини ва Бельгия терма жамоаси учун ўйнашини исташади.
