Машҳур бразилиялик футбол афсонаси Пеле буйрагидаги муаммолар туфайли Сан-Паулу шаҳридаги касалхонага тушиб қолгани ҳақида аввалроқ хабар бергандик.
Ўтган вақт мобайнида кекса футболчининг соғлиғи ҳам ижобий, ҳам салбий томонларга ўзгариб турди. Аммо шифокорларнинг саъй-ҳаракатлари билан унинг саломатлиги қайта тикланди. Хабарларга қараганда, Пеле 9 декабрь куни касалхонадан уйга кетган.
«Бемор ўзини яхши ҳис қиляпти ва унга энди инфекциядан зарарланиш ҳолати хавф солмаяпти. Пеленинг соғлиғи кутилганидан ҳам тезроқ яхшилангани учун шифокорлар консилиуми унга уйига қайтишга рухсат берди», - дейилади клиника баёнотида.
Эслатиб ўтамиз, футбол қироли биринчи марта 13 ноябрда илк касалхонага тушган ва врачлар унга азо ббераётган буйракдаги тош парчасини олиб ташлашганди. Лекин жарроҳлик вақтида ярага инфекция тушиши оқибатида 74 ёшли бемор 24 ноябрь куни яна «таниш» палатага ётқизилганди.
