Ямайкада 20 ёшгача бўлган футболчилар ўртасида КОНКАКАФ минтақаси чемпионати якунига етди. Натижада шу йилнинг май ойида Янги Зеландияда бўлиб ўтадиган ёшлар ўртасидаги ЖЧда иштирок этадиган терма жамоалар номи маълум бўлди.

12та терма жамоа 6тадан икки гуруҳга бўлиниб, мусобақаларда иштирок этишди. Гуруҳ ғолиблигини қўлга киритган Панама ва Мексика терма жамоалари финалда иштирок этиш билан бирга ЖЧ йўлланмасини ҳам қўлга киритишди. Финалда 1:1 ҳисоби қайд этилди. Пенальтилар сериясида эса Мексика ғалаба қозонди (4:2).

Гуруҳларда 2 ва 3-ўринни эгаллаган жамоалар эса ўзаро плей-офф орқали ЖЧ йўлланмасини ҳал қилишди. Унда АҚШ Сальвадорни, Гондурас эса Гватемалани мағлубиятга учратишди.

Шу тариқа КОНКАКАФдан Мексика, Панама, АҚШ ва Гондурас терма жамоалари Янги Зеландиядаги мусобақада иштирок этишади.

Шунингдек, ЖЧда қатнашадиган Европа жамоалари ҳам аниқланган: Австрия, Германия, Венгрия, Португалия, Сербия, Украина. Океаниядан мезбон Янги Зеландияга қўшиб, Фижи ҳам иштирок этади. Осиёдан эса КХДР, Қатар, Мьянмар ва Ўзбекистон терма жамоалари ЖЧда иштирок этишади.

КОНМЕБОЛ минтақасида мусобақанинг дастлабки босқичи якунига етди. Аргентина, Бразилия, Колумбия, Парагвай, Перу ва Уругвай термалари ҳал қилувчи босқичда бир даврали тизимда ўзаро баҳс олиб борадилар. Тўртта кучли жамоа Мундиал йўлланмасига эга бўлади. Турнир 7 февраль куни якунига етади.

ЖЧ қуръаси 10 февраль куни бўлиб ўтади. Африкада ёшлар ўртасидаги мусобақа 8-22 март кунлари ўтказилади. Африка жамоалари кейинчалик гуруҳларни тўлдиришади.