“Севинч” жамоасининг ютуқларига салмоқли ҳисса қўшган ва жамоамизнинг тажрибали ярим ҳимоячиси 19-рақам остида ҳаракат қилган футболчи қизимиз Мария Моисеева футболчилик фаолиятин якунига етказди.
Мария Моисеева “Севинч” жамоасида муваффақиятли фаолият юритди. У жамоамиз сафида кўплаб мамлакатимизда ўтказилган чемпионатларда, хорижий турнирларда совриндор бўлди. У шунингдек мамлакатимиз терма жамоаси сафида ҳам ўйнаб, ўзини моҳир футболчи эканлиги намойиш қилди.
Мария Моисеева бу йилдан футболни тарк этишга қарор қилди ва кейинги фаолиятини ёшларга таълим-тарбия беришга бағишлашга қарор қилди. Ўзбекистон Давлат жисмония тарбия институтининг магистратурасини тугатган Моиссева эндиликда Тошкент ахборот технологиялари университетида талабаларга таълим беради.
Бугун клубимиз қошидаги ресторанда Мария Моисеевани кузатиш маросими ўтказилди. Маросимда жамоамиз бош мураббийи В.Н.Хан Мариянинг жамоа ютуқларига қўшган ҳиссалари тўғрисида тўхталиб, унинг кейинги фаолиятида улкан зафарлар тилади.
Шунингдек кечада клубимиз раҳбари Нодир Халилов ҳам иштирок этиб, Моисеевага “Севинч” жамоасидаги фаолияти учун клуб раҳбарияти номидан ва барча футбол ишқибозлари номидан каттадан-катта ташаккурлар изҳор этди. Жумладан, “Жамоамизни бир оила деб билсак, Мария унинг аллақачон тўлақонли аъзосига айланди. Унинг хулқи ҳам ўйинчи сифатидаги фаолияти ҳам ёш футболчи қизларимизга ҳақиқий ўрнак бўлди. Биз Мария билан хайрлашмаймиз балки, у доимо бизнинг катта оиламизнинг аъзоси сифатида қолади ва унинг учун ҳар доим эшикларимиз очиқ бўлади. Шуни ишонч билан айтаманки, у кейинги ҳаётида ҳам худди жамоамиздаги каби катта ютуқларга эришади.”,-дейди Нодир Халилов.
Шундан сўнг клубимиз раҳбари ҳамда жамоамиз бош мураббийлари Мария Моисеевага эсдалик совғалари ва гулдаста тақдим қилишди.
Ушбу маросим билан бирга бугун туғилган кунини нишонлаётган Феруза Турдибоевани ҳам Н.Халилов ва В.Ханлар қизғин табриклашди. Ферузага ҳам эсдалик совғаси ва гулдаста топширилди. Футболчи қизларимиз ҳам Мария ва Ферузага ўзларининг эзгу тилакларини билдиришди.
Кеча байрамона тузатилган дастурхон атрофида давом этди.
Қуйида маросим пайти олинган суратларни томоша қилинг.
Бош ошпаз опамиз Соҳиба опа (чапдан биринчи) бошчилик “қўли ширин” пазанда опаларимиз кеча қатнашчиларининг хизматида бўлишди.
Суратлар муаллифи Умида Ренатова
