Ўзбекистон олимпия терма жамоаси ҳимоячиси Максимилиан Фоминнинг онаси Татьяна Фомина ўғлининг Фейсбукдаги мурожаати учун мухлислардан узр сўради. Унинг мурожаатини Safinas Ahayeva исмли фойдаланувчи келтирган.
"Ушбу хабарни ёзишни мендан Макснинг онаси Татьяна илтимос қилди. Боиси, унинг Фейсбукда саҳифаси йўқ, аммо у содир бўлган воқеадан хавотирга тушди.
"Ҳурматли, ишқибозлар, аввало Максимнинг дастлабки кескин фикрлари учун узр сўрайман. У жаҳл устида ёзган ва ҳозир бундан афсусланмоқда. Лекин, илтимос, сиз ҳам тўғри тушунинг, жамоа шаънига ҳақоратлар ёғдирилганидан кейин, шунингдек, мени ҳам ҳақорат қила бошлашганидан сўнг... Бу ўйин, бу спорт. Бугун ғалаба қозонилса, эртага мағлубият бўлиши мумкин. Муваффақият ёки муваффақиятсизликка қарамай, ўйинчиларимиз сизларнинг қўллаб-қувватлашингизга муҳтож. Тўғри тушунасиз, деган умиддаман. Ҳурмат билан, Татьяна Фомина".
Эслатиб ўтамиз, Ироққа қарши ўйиндаги мағлубиятдан кейин мухлислар футбол сайтларда футболчиларни кескин танқид ва ҳақорат қилгани учун Максимилиан Фомин Фейсбук орқали ишқибозларга ҳақоратларга тўла мурожаат йўллаганди. Футболчининг ушбу хатти-ҳаракати кескин норозиликларга сабаб бўлди. Натижада Фомин Фейсбук орқали мухлислардан узр сўраганди.
