O‘zbekistonlik yarim himoyachi Odil Ahmedov 2017 yilda Namanganda o‘zining shaxsiy futbol akademiyasini tashkil qiladi. Bu haqda futbolchi "Oriat Dono" radiosining "Choy ustida" dasturi orqali ma’lum qildi.

"Haqiqatan ham Namagangada futbol akademiyasini ochmoqchiman. Bu masalada viloyat hokimi bilan gaplashdim. Nasib qilsa, 2017 yilning yozida Farg‘ona vodiysi bo‘ylab sinov tashkil qilib, iqtidorli futbolchilarni akademiyaga jalb qilmoqchimiz. Bu orqali Vodiy futbolining rivojiga o‘z hissamni qo‘shmoqchiman.

Akademiyaga qabul qilishda asosiy e’tiborni bolaning qobiliyatiga qaratiladi. Faqat Vodiydan emas, yurtimizning boshqa viloyatlaridan ham bolalarni qabul qilamiz. Yuqorida aytib o‘tganimdek, Vodiydan yaxshi futbolchilarning yetishib chiqishini istaymiz.

Yaxshi futbolchi yetishib chiqishi ko‘p jihatdan murabbiyga bog‘liq. Akademiyaga ishini yaxshi ko‘radigan murabbiylarni qabul qilamiz. Hozirda ko‘p murabbiylar faqat maosh uchun ishlashadi. Futbolni va o‘z ishini yaxshi ko‘radigan murabbiylar ko‘p emas.

Shuningdek, xorijlik murabbiylar bilan gaplashganman, ular O‘zbekistonga tashrif buyurib, menga yordam berishga va’da berishdi. Yosh futbolchilarni malaka oshirish uchun "Krasnodar"ga yuborishni reja qilib qo‘yganman. Shunda yaxshi natijaga erishishimiz mumkin", - deydi Odil Ahmedov.