Ispaniya chempionatining 19-turi doirasida "Eybar" maydonida mehmon bo‘lgan "Barselona" yirik hisobda g‘alaba qozondi.

"Eybar" o‘z maydonida har qanday jamoaga jiddiy qarshilik ko‘rsata oladigan jamoa. Mezbonlar birinchi bo‘limning o‘rtalarigacha "Barsa" futbolchilariga nisbatan kuchli pressing namoyish qilib, ularga o‘z o‘yinlarini topib olishga imkoniyat bermadi.

O‘yinning 32-daqiqasida kataloniyaliklar hisobni ochishga muvaffaq bo‘lishdi. Messining jarima maydonchasi tashqarisidan bergan zarbasidan keyin to‘p himoyachiga tegib qaytdi. Denis Suares esa 22 metrlardan aniq zarba bilan darvozani ishg‘ol qildi.

Enrike shogirdlari tanaffusga qadar hisobni yirik ko‘rinishga keltirishlari mumkin edi. Biroq yakkama-yakka vaziyatda Neymarning zarbasini "Eybar" posboni qaytargan bo‘lsa, Luis Suaresning zarbasidan keyin to‘p ustunga tegib qaytdi.

Ikkinchi bo‘lim boshida esa Messi o‘z imkoniyatidan samarali foydalandi. Leo to‘pni Luis Suaresga uzatdi va o‘zi mehmonlar jarima maydonchasi tomon yugurdi. Urugvaylik futbolchi o‘z vaqtida jamoadoshi tomon uzatma berdi. Messi darvozabon bilan yuzma-yuz vaziyatda to‘pni darvozaga joyladi.

Oradan ko‘p o‘tmasdan Luis Suares ham o‘z hisobiga gol yozishga muvaffaq bo‘ldi. U raqib himoyachisidan to‘pni olib qo‘yib, darvozabon bilan birga-bir vaziyatga chiqdi va yaqin burchakni aniq nishonga oldi.

So‘nggi daqiqalarda maydon egalari ikki marta gol urish uchun yaxshi imkoniyatga ega bo‘lishdi. Ammo bir vaziyatda Ter Shtegen, ikkinchisida esa noaniq zarba to‘pning darvozadan o‘rin olishiga xalal berdi.

Qo‘shib berilgan daqiqalarda esa Neymar ham o‘z nomini tabloga yozdirib qo‘ydi va yakuniy hisobni o‘rnatdi — 0:4.

Ushbu g‘alabadan keyin "Barselona" o‘z ochkolarini 41taga yetkazdi va jamoa birinchi davrani 3-o‘rinda yakunlamoqda. "Ko‘k-anorranglilar" "Real"dan 2, "Sevilya"dan 1 ochko ortda qolishmoqda.

Ispaniya La ligasi, 19-tur
Eybar – Barselona 0:4 (0:1)
Gollar: 0:1 – 31 Suares, 0:2 – 50 Messi, 0:3 – 68 Suares, 0:4 – 90 Neymar.
Eybar – Yoel, dos Santos, Luna (Rivera, 82), Kapa, Lejen, Eskalante, Dani Garsiya, Gonsales (Riko, 74), Leon, Inui (Penya, 78), Enrik.
Barselona – ter Shtegen, MatYE, Umtiti, Alba, Serji Roberto (Aleish Vidal, 65), Rakitich, Buskets (Suares, 10), Turan, Neymar, Messi, Suares (Pako Alkaser, 76).
Ogohlantirishlar: Eskalante (26), Kapa (39), Turan (42), Enrik (44).