«Barselona» har doim ham 4:0 hisobida yutqazavermaydi. Bu 2013 yilda Myunxenda Chempionlar Ligasi yarim finalida sodir bo‘lgandi, yana 2017 yilda Parijda takrorlandi. «Alyans Arena»dagi 4:0 hammani shokka tushirgandi, zero bu o‘ziga xos uslub bilan barcha sovrinlarni qatorasiga yutib kelayotgan va futbolni o‘zgartirib yuborgan jamoa edi.
Bu mag‘lubiyat, keyin «Kamp Nou»dagi javob o‘yinida qayd etilgan 0:3 hisobidagi yana bir mag‘lubiyat ushbu jamoaning yakuni edi. Jamoadagi shaxslarning emas, balki o‘yin falsafasining yakuni edi. «Barsa» Yupp Xaynkessning tezkor va jismonan kuchli «Bavariya»si tomonidan yanchib ketilgach, «tiki-taka»ga rasman yakun yasaldi.
O‘sha mavsum oxirida jamoa bosh murabbiyi Tito Vilanova saratondan davolanishni davom ettirish uchun iste’foga chiqdi, uning o‘rnini esa dastlab Xerardo Martino, 2014 yilda Luis Enrike egalladi. Hozirgi murabbiy o‘zining dastlabki mavsumida trebl, ikkinchi mavsumida esa Ispaniyada dubl qayd etgan bo‘lsa-da, bu butunlay boshqacha uslub edi.
Endi esa Enrike o‘zining eng quyi darajasida turganga o‘xshamoqda. Chempionlar Ligasi nimchorak finali dastlabki o‘yinida «PSJ»da uchralgan 4:0 hisobidagi mag‘lubiyat kataloniyaliklar uchun yana nimaningdir yakuni bo‘lishi ko‘p aytilmoqda.
Hozirda «Barselona» o‘zining fantastik hujum uchligi – Messi, Suares va Neymarning o‘yiniga juda bog‘liq. 2008-2012 yillarda Pep Gvardiola murabbiyligidagi jamoaning asosi bo‘lgan «tiki-taka» va yarim himoyadagi pozitsion o‘yinga asoslangan uslubning faqat bir qismigina qolgan.
Xavi, Inyesta va Busketsdan iborat bo‘lgan «Barselona»ning eng kuchli chizig‘i hozirga kelib eng muhim emas, shunchaki oddiy chiziqlaridan biriga aylangan. «Park de Prens»da esa MSN ham hech narsa qila olmagach, «Barselona»ni sharmandali amg‘lubiyatdan hech narsa qutqara olmadi.
Yozda «Barselona» bilan shartnomasi tugaydigan Enrike iyun oyida haqiqatan ham jamoani tark etadiganga o‘xshab turibdi. Bu «Barselona» uchun o‘zining haqiqiy kuchi qayerda ekanligi haqida mulohaza yuritish uchun yaxshi imkoniyatdir. Murabbiylik kursisini kim egallashidan qat’i nazar, to‘p uzatishlarga asoslangan falsafani qaytarish orqali «Barselona»ga xilma-xillikni qaytarishi mumkin.
Shunday ekan, 4 yil oldin Myunxenda uchralgan 4:0 hisobidagi mag‘lubiyat «tiki-taka» va unga asoslangan pozision o‘yinga yakun yasab bergan bo‘lsa, endi yana shunday mag‘lubiyat uni qaytarishga sabab bo‘lishi mumkin.
