“Al-Ahli” – "Bunyodkor" uchrashuvidan keyingi matbuot anjumanining birinchi qismida “qarlidg‘ochlar” ustozi Sergey Lushan ishtirokida matbuot-anjumani bo‘lib o‘tdi.
- Ikkala jamoa ochiq futbol namoyish etdi. Chunki ikki klub o‘yin uslublari o‘xshash edi. G‘alaba qozonishimiz mumkin bo‘lgan bahsda mag‘lubiyatga uchradik. O‘yin statistikasiga e’tibor bersangiz, ustunlik biz tomonda. Afsuski, himoyadagi ikkita xatodan raqib unumli foydalandi. Biz esa o‘zimiz yaratgan 8 ta vaziyatdan bittasini ham golga aylantira olmadik. Tarkibda yosh futbolchilar ko‘p, ba’zi o‘yinchilar xatto 20 yoshga ham to‘lmagan. Jamoa a’zolarining 70% 21 yoshgacha bo‘lgan futbolchilar. G‘alaba va mag‘lubiyatda bu yigitlarga ishonishda davom etaman. Bu 1-tur uchrashuvi edi. Oldinda yana o‘yinlar bor. Hayot davom etadi.
Oldinda yana 5 ta bahs bor. Xalqaro o‘yinlarda futbolchilarimiz yanada toblanadi. Bundan faqat o‘zbek futboli yutadi. Guruh bosqichini muvaffaqiyatli yakunlab, xalqaro o‘yinlarimiz sonini oshirishga umid qilamiz" - deydi Sergey Lushan.
