Shu yilning 6–11 mart kunlari Birlashgan Arab Amirliklarining Dubay shahrida o‘quv-mashg‘ulotlarida bo‘lib, BAA yoshlariga qarshi ikkita o‘rtoqlik o‘yinida maydonga tushgan O‘zbekiston U-19 terma jamoasi navbatdagi yig‘inni aprel oyi o‘rtalarida o‘tkazadi.
Aleksandr Mochinov qo‘li ostidagi jamoa 16–21 aprel kunlari Serbiya poytaxti Belgrad shahrida jam bo‘ladi. Yig‘in doirasida O‘zbekiston yoshlar termasi 18 va 20 aprel kunlari serbiyalik tengdoshlariga qarshi o‘rtoqlik o‘yinlari o‘tkazadi.
Navbatdagi yig‘in O‘zbekiston U-19 terma jamoasining 2018 yili yoshlar o‘rtasida bo‘lib o‘tadigan Osiyo chempionati saralash bosqichiga tayyorgarlik rejasidan o‘rin olgan. Saralash bosqichi uchrashuvlari shu yilning 31 oktyabr – 8 noyabr kunlari bo‘lib o‘tadi.
