Yevrokuboklarning ushbu mavsumi futbol muxlislariga ko‘plab unutilmas onlarni taqdim qilyapti.
G‘oliblik uchun kurashayotganlar orasida dunyoning eng kuchli jamoalari bilan birgalikda, avval favorit hisoblanmagan klublar ham bor.
Ularning o‘zaro o‘yinlari esa hech kimni befarq qoldirmayapti. Chempionlar ligasining yakuniga yetgan 1/8 final bahslarida urilgan jami 62ta gol musobaqa tarixidagi ushbu bosqichning rekord natijasini keltirib chiqardi.
17 mart kuni Shveysariyaning Nyon shahrida Yevropa chempionlar ligasi hamda Yevropa ligasining chorakfinaliga qur’a tashlash marosimi o‘tkaziladi. Ushbu voqeani futbol muxlislari UZREPORT TV telekanalida jonli efirda tomosha qilishlari mumkin.
Ma’lumot uchun, Yevropa Chempionlar ligasi 1/4 finaliga quyidagi jamoalar yo‘l olishdi:
“Atletiko”, "Bavariya", "Barselona", "Borussiya", “Monako”, "Real", “Lester”, “Yuventus”.
Yevropa Ligasi 1/4 finalida ishtirok etish huquqini qo‘lga kiritadigan jamoalar nomi esa bugun tunda bo‘lib o‘tadigan o‘yinlardan keyin ma’lum bo‘ladi.
Yevropa Chempionlar ligasi qur’a marosimi soat 16:00da, Yevropa ligasiniki esa soat 17:00da boshlanadi.
Ushbu translyasiyalar vaqtini inobatga olgan holda, avval 16:00da namoyish etilishi rejalashtirilgan Yevropa ligasidan o‘rin olgan “Roma” – “Lion” uchrashuvi ertaga soat 14:00da efirga uzatiladigan bo‘ldi.
UZREPORT TV orqali Yevropaning eng nufuzli futbol turnirlarini kuzatishda davom eting!
