«Andijon» mavsumlar oralig‘idagi so‘nggi yig‘inini Toshkentda olib bormoqda.

Poytaxtdagi yig‘in chog‘ida futbolchilar kuniga ikki mahaldan shug‘ullanib, bir qator sinov-nazorat o‘yinlarida ham maydonga tushdi.

Xususan Qozog‘istonning «Kaspiy» (0:0) va Buxoroning «Nurafshon» (0:0) jamoasi bilan durang qayd etdi. Toshkentning «O‘rikzor»i esa 3:1 hisobida taslim etildi. Kecha «burgutlar» navbatdagi o‘rtoqlik o‘yinini «Xorazm»ga qarshi o‘tkazib, 2:1 hisobida g‘alaba qozondi.

Uchrashuvda avvaliga urganchliklar standart vaziyatdan hisobni ochgan bo‘lsa, so‘ngra andijonliklardan Farruh Shotursunov bilan Shahboz Jumaboyev javob qaytardi.

Tarkibga markaziy himoyachi Timur Kagirov kelib qo‘shilganini ma’lum qilamiz. Muxlislar yaxshi bilishsa kerak, tajribali futbolchi ilgari ham «Andijon» (2005 va 2008 yillar) safida o‘ynagandi.

Ertaga jamoamiz «Bunyodkor» yoshlariga qarshi sinov-nazorat bahsida maydonga tushadi. Shundan so‘ng «Andijon»ning Toshkentdagi yig‘ini yakuniga yetadi.