6 iyun kuni Toshkentda Tailand milliy terma jamoasi bilan o‘rtoqlik uchrashuvini o‘tkazar ekanmiz. Bu 13 iyun kuni Tehronda Eron milliy terma jamoasiga qarshi bo‘lib o‘tadigan saralash uchrashuvidan oldin o‘ziga xos tayyorgarlik vazifasini o‘tab beradi.

Nega endi Tailand? Bemavrid va noo‘rin jamoa emasmi?

Men ushbu maqolamda kecha Malayziyada Suriyaga qarshi o‘yin oldidan siam yurtining janubroq shahrida - Malayziyaga yaqinroq joyda Tailandga qarshi 18-19 mart kunlari o‘rtoqlik o‘yinlari o‘tkazish kerak edi, deb yozdim. Chunki Tailand kecha o‘z maydonida Saudiyani qabul qildi.

Lekin kechagi o‘yindan oldin o‘ynamadik. Foydasi bo‘lar edi aniq. Kimlar tayyormasligini bilib olardik va maydonda "o‘lik" Odil Ahmedovni ko‘rmasmidik...

13 iyunda Tailand o‘z maydonida BAAni qabul qiladi. Shu o‘rtoqlik uchrashuvini o‘tkazish uchun taylar Toshkentga kelib ketisharkan.

Mayli, o‘rtoqlik uchrashuvi albatta kerak, lekin nega kechagi o‘yindan oldin tanlanmadi u? Axir Tailanda qarshi shu oyda o‘ynab ham, 6 iyunda ularning o‘rniga Iroq yo Yaponiya tanlansa bo‘lar edi-ku?!

Iroq - o‘z-o‘zidan o‘yin uslubi Eronga yaqin, kuchli jamoa. 13 iyun kuni ular ham neytral maydon — Eronda Yaponiyaga qarshi maydonga tushishadi. Agar Iroq bilan kelishuvga erishilganida Eronga birga uchib boraverardi ikki jamoa. Tailand bilan o‘yin terma jamoamizga nima berishi noma’lum. Xitoy Xorvatiya bilan o‘ynaganda biz Gruziya bilan o‘ynaymiz. Suriya Yaponiya bilan o‘ynaganda biz Tailand bilan. Nima bu, muhim o‘yin oldidan osonroq raqib topib, futbolchilarimizning "samosenka"sini oshirish uchun tutilgan yo‘lmi?

Yaponiyaga-ku, kechikib bo‘libmiz, Suriya 6 iyun kuni Tokioga borib, Xitoyga qarshi uy uchrashuvidan avval ularga qarshi o‘ynab kelishar ekan. Terma jamoalar o‘rtoqlik uchrashuvi uchun o‘ta murakkab manzillarni tanlayotganda nega oldiginamizda turgan o‘ta qulay sharoitdan foydalanmaymiz?
 
Xo‘sh, nega Iroq emas, Tailand? Kimlar ishlaydi-e u terma jamoalar markazida, juda qiziq? Maktabda geografiya fanini o‘tishganmikin?

Shuhrat Shokirjonov.