Osiyo Chempionlar Ligasi “A” guruhi 4-turidan o‘rin olgan “Lokomotiv” – “Istiqlol” (Tehron) uchrashuvi oldidan o‘tkazilgan matbuot anjumanining ikkinchi qismida “temiryo‘lchilar” ustozi Andrey Miklyayev va yarim himoyachi Ikrom Aliboyev o‘z fikrlarini bildirdi.

“Ertangi o‘yin qanchalik muhim ekanini yaxshi tushunib turibmiz. Guruhdan chiqish uchun ertaga faqatgina g‘alaba qozonish kerak. Buni murabbiylar ham, futbolchilar ham biladi. Bellashuv biz uchun omadli kechishiga umid qilamiz. Safarda “Istiqlol”ga mag‘lub bo‘ldik, ammo ayta olamanki, bu jamoani mag‘lubiyatga uchratish mumkin.

Futbolda omad ham kerak bo‘ladi. “Sho‘rtan” bilan o‘yinni oladigan bo‘lsak, o‘sha kuni omad bizdan yuz o‘girgandi. Umuman olganda, himoya chizig‘idan shikoyatim yo‘q, chunki ko‘p gol o‘tkazmayapmiz. Ba’zida tajribalar qilib, futbolchilarni almashtirib turamiz. Masalan, qaysidir o‘yinda Bobur Yo‘ldoshev maydonga tushsa, ba’zida Muhammad Kone o‘ynaydi.

Afsuski, bo‘lajak o‘yin oldidan yo‘qotishlar bor. Shuhrat Muhammadiyev jarohatidan forig‘ bo‘lishga ulgurmadi. Shuningdek, Samalat Qutiboyevda ham jarohat bor.Muhammadiyev va Qutiboyev ertaga maydonga tushmaydi. Shuningdek, Temur Kapadzeda yengil jarohat bor. Uning ertangi o‘yinda maydonga tushishi bugun ma’lum bo‘ladi”, – dedi Andrey Miklyayev.

“Ertaga bizni qiyin o‘yin kutib turibdi. Sababi, guruhdagi barcha jamoalar bir-biriga yaqin joylashgan. Umid qilamanki, ertangi o‘yin ijobiy natija bilan bizning foydamizga hal bo‘ladi”, – dedi Ikrom Aliboyev.

Eslatib o‘tamiz, “Lokomotiv” – “Istiqlol” uchrashuvi ertaga, 11 aprel kuni TTZ mavzesidagi “Lokomotiv” stadionida bo‘lib o‘tadi. Uchrashuv soat 16:00 da start olishi rejalashtirilgan.