2005 yil 6 iyulda tashkil topgan «Bunyodkor» oliy ligaga ilk marta 2007 yili tashrif buyurib, yakunda kumush medal sohibiga aylangandi. 2007-2008 yillarda «Quruvchi» nomi ostida faoliyat yuritgan jamoa 2009 yili butun mavsumni mag‘lubiyatsiz o‘tkazdi (28 g‘alaba, 2 durang). Bunday holat oldin «Neftchi» (1994 yil, 21 g‘alaba, 9 durang) hamda «Paxtakor» (2007 yil, 26 g‘alaba, 4 durang) bilan ham yuz bergandi. «Sherlar» keyinroq yana butun mavsumni mag‘lubiyatsiz o‘tkazishni uddalashgan (2014 yil, 23 g‘alaba, 3 durang).

2017 yil 6 aprel sanasida «qaldirg‘ochlar» o‘z uylarida Zarafshonning «Qizilqum» klubini qabul qilib, o‘z tarixlarida (oliy liga doirasida) 30-marta imkoniyatni boy berishdi. Bu klub 2007 yildan buyon elitada ishtirok etayotgan bo‘lsa, uning hisob bo‘yicha 30-mag‘lubiyati oradan 10 yil o‘tib yuz berdi. «Bunyodkor»ni yengish atigi 13ta klubga nasib qilgan. Jamoaning eng yirik mag‘lubiyati 0:3 bo‘lib, bunday hisob bir marta uchragan. «Qaldirg‘ochlar»ning oliy ligada jami 284ta o‘yin o‘tkazishganini inobatga olsak, mag‘lubiyatlar jami o‘yinlarning 10,6 foizini tashkil etishi oydinlashadi.

«Metallurg» (2007 yil), «Paxtakor» va «Nasaf» (2014), «Neftchi» (2015 yil) bir mavsumning har ikki davrasida «Bunyodkor»ni yenggan kamsonli klublardir. Ayni payt oliy liga jamoalari orasida undan kam mag‘lubiyatga uchragan jamoa - «Obod» (20ta mag‘lubiyat). Hozircha elitada eng ko‘p yengilgan klub o‘tgan yil yakunlariga ko‘ra, birinchi ligaga tushib ketgan «Andijon» bo‘lib turibdi (328ta mag‘lubiyat).

Eslatma, so‘nggi - 6-tur natijalari inobatga olinmagan