Dilshod Nuraliyev bosh murabbiyligidagi O‘zbekiston o‘smirlar terma jamoasi Armaniston poytaxti Yerevan shahrida davom etayotgan Development Cup xalqaro turnirida muvaffaqiyatli yurishini davom ettirmoqda.

O‘zbekiston o‘smirlar termasi kecha, 20 aprel kuni Armaniston U-15 futbolchilariga qarshi bahs olib bordi va 1:0 hisobida zafar quchdi. Uchrashuvdagi yagona golga Ruslan Ro‘ziyev mualliflik qildi. Parallel ravishda bo‘lib o‘tgan o‘yinda Makedoniya va Kipr o‘smirlari 1:1 hisobida durang o‘ynadi.

Eslatib o‘tamiz, Makedoniya o‘smirlariga qarshi bellashuvda Dilshod Nuraliyev shogirdlari 2:1 hisobida zafar quchdi.

Bo‘lib o‘tgan ikki turdan keyin O‘zbekiston U-15 termasi 6 ochko bilan birinchi o‘rinda bormoqda. Kipr 4 ochko bilan ikkinchi, Makedoniya 1 ochko bilan uchinchi o‘rinda bormoqda. Mezbon Armaniston o‘smirlar termasi hisobida ochko yo‘q.

Estaga, 22 aprel kuni musobaqaning so‘nggi o‘yinlari bo‘lib o‘tadi. O‘zbekistonlik futbolchilar Kipr bilan, armanistonlik futbolchilar esa Makedoniya bilan bahs olib boradi. 

Mazkur musobaqa O‘zbekiston o‘smirlar termasi uchun 2018 yilgi U-16 Osiyo chempionatiga saralash bosqichiga tayyorgarlik vazifasini o‘taydi. Saralash bosqichi shu yilning 16–24 sentyabr kunlari bo‘lib o‘tadi.