Oliy liganing 7- turida “Navbahor” o‘z maydonida G‘uzorning “Sho‘rtan” klubini qabul qildi.
Birinchi bo‘lim mezbonlarning ustunligida o‘tdi. 33-daqiqada Taran yaqin masofadan gol urolmaganini inobatga olmaganda, "Sho‘rtan" darvoza oldida xavfli vaziyatlarni yarata olmadi.
Namanganliklardan Nemanya Yovanovichning "ikkinchi qavat"dagi faolligi, Mirzohid G‘ofurovning o‘ng qanotdan katta tezlikda oldinga o‘tishi, Ahmedovning kuchli zarbalari mehmonlarni xavotirlanishiga sabab bo‘ldi. Ammo bellashuvning birinchi yarmida o‘yingohga yig‘ilgan tomoshabinlar gol ko‘rishmadi.
Tanaffusdan so‘ng "Sho‘rtan" o‘yinida biroz ijobiy o‘zgarish bo‘ldi. Ammo darvozabon va himoyachilarning ishonchli o‘yini raqibga gol urish uchun imkon qoldirmadi.
57-daqiqada Yovanovich hisobni ochishga yaqin kelgandi. Nemanyaning chalqancha usulda yo‘llagan zarbasini Tojiboyev bartaraf etishga muvaffaq bo‘ldi. Oradan 10 daqiqa o‘tgach unda yana qulay imkoniyat vujudga kelgandi, biroq yana omad undan yuz o‘girdi.
Uchrashuv yakunlanishiga 12 daqiqa qolganida mezbonlar o‘z maqsadiga erishdi. "Navbahor" jarima to‘pi ishladi. Oybek Qilichev standart vaziyatdan unumli foydalanib, uchrashuvda hisobni ochdi.
Shu tariqa uchrashuvdagi yagona gol "navbahorchilar"ga uch ochkoni taqdim qildi.
Oliy liga, 7-tur
22 aprel. Namangan. “Markaziy” o‘yingoh.
“Navbahor” – “Sho‘rtan” – 1:0 (0:0)
Gol: O. Qilichev (78).
Hakamlar: I. Tantashev, X. Shodmonov, A. Qo‘ldoshev, D. Jalimov.
Nazoratchi – A. Abdullayev.
"Navbahor": 30. Asilbek Amanov, 4. Abbos Otaxonov (77.Aziz Turg‘unboyev, 46, 10. Mansur Saidov, 63), 5. G‘iyos Komilov, 7. Oybek Qilichev, 9. Dilshod Jabborov, 19. Mirzohid G‘ofurov, 21. A’zam Aliyev, 22. Ro‘zimboy Ahmedov (33. Tohir Shamshitdinov, 81), 32. Jahongir Mehmonov, 44. Darko Stanoyevich, 84. Nemanya Yovanovich.
“Sho‘rtan”: 1. Eldor Tojiboyev, 3. Aziz G‘ulomxo‘jayev (29. Qadamboy Nurmetov, 81), 9. Igor Taran (10. Oleksandr Pishur, 83), 11. Zafar Polvonov, 14. Umarbek Eshmurodov, 15. Obid Jo‘raboyev, 18. Eldor Boymatov, 19. Ma’rufxon Murodov (17. G‘ulom Rahmonov, 65), 22. Siroj Xamroyev, 27. Sardor Sobirxo‘jayev, 77. Otabek Narzullayev.
Ogohlantirishlar: A. Otaxonov (29) - S. Hamroyev (7), O. Jo‘raboyev (45+2).
