Xalqimizda xotira muqaddas degan ibora mavjud. O‘tganlarni yodga olish, ular amalga oshirib ketgan ishlarini eslash juda yaxshi odat.

Baxtiyor Davlatovni mamlakatimiz futbol ishqibozlari yaxshi eslashadi. Yangiyerda tug‘ilib o‘sgan Baxtiyor Davlatov 36 yoshida futbolchilik faoliyatini tugatgandi. Shundan beri “Mash’al”, keyinchalik “Yangiyer” jamoasida ma’mur sifatida ishlab kelayotgandi. Baxtiyor Boyjonovich hayot bo‘lganida 48 yoshni qarshi olgan bo‘lar edi. Uning “Mash’al” va “Nasaf” jamoalari safida ko‘rsatgan yorqin o‘yinlari hamon muxlislar yodida. O‘z vaqtida “Yangiyer”, “Kosonsoy”, “Metallurg” singari klublarda ham to‘p surgan iqtidorli hujumchi Baxtiyor Davlatov 2013 yil olamdan o‘tgan edi.

Yangiyer shahrida keyingi yillarda tashkil etilayotgan Baxtiyor Davlatov xotira turniri ommaviylashib bormoqda. Bu turnirga qiziqish yildan-yilga ortib bormoqda. Bu yilgi Xotira turniri 23-29 aprel kunlari Yangiyerdagi markaziy o‘yingohda bo‘lib o‘tadi. Unda Jasur Ibragimov va Umar Rahmatillayev murabbiylik qilayotgan 2003 yilda tavallud topgan «Nasaf» tarbiyalanuvchilari ham ishtirok etadi.