"Bunyodkor” – “Al-Ahli” uchrashuvi oldidan tashkil etilgan matbuot anjumanida “qaldirg‘ochlar” ustozi Sergey Lushchan va yarimhimoyachi Davronbek Umirov ishtirok etdi.

- Yo‘qotadigan narsamiz yo‘q. Shunday ekan, ertaga shogirdlarimdan sifatli, mazmunli va chiroyli futbol kutyapman. Ular yaxshi o‘ynashga qodir va buni uddalaydilar, degan umiddaman. Tarkib borasida ba’zi muammolar bor. Har qanday holatda ham g‘alaba uchun maydonga tushamiz va bahsga tayyormiz. Raqib kuchli, bizda esa yoshlar ko‘p. Balki “Bunyodkor” Chempionlar ligasining nafaqat bu yilgi, balki turnir tarixidagi eng yosh jamoasidir. Yosh futbolchilarimiz bunday nufuzli turnir orqali ulkan tajribaga ega bo‘lib borishmoqda. Hozirgi kunda 60ga yaqin tarbiyalanuvchilarimiz turli xil jamoalarda ijara asosida to‘p tepishmoqda. Tasavvur qiling, uch yildan keyin ularning soni yana qanchaga oshadi. G‘alabaga tashnalik borasida hammasi joyida, deb o‘ylayman. Umid qilamanki, ertaga muxlislarimizni xursand qilamiz, - dedi Sergey Lushchan.

- Bizga murabbiylar tomonidan yetarlicha imkoniyatlar berilmoqda. Ulardan oqilona foydalanib, tarkibdan muqim joy egallashga va yaxshi o‘yinlarimiz bilan muxlislarni xursand qilishga harakat qilamiz. Guruhdan chiqish imkoniyatlarimiz qolmagan bo‘lsa-da, kuchli raqibni yengishga harakat qilamiz, - dedi Davronbek Umirov.