Osiyo Chempionlar Ligasi “A” guruhi 5-turidan o‘rin olgan Toshkentning “Lokomotiv” va Saudiya Arabistonining “Al-Tavun” klublari o‘rtasidagi uchrashuv oldidan matbuot anjumani bo‘lib o‘tdi. Anjumanning birinchi qismida saudiyaliklar bosh murabbiyi Joze Manuel Gomesh ishtirok etdi.
“Ertangi o‘yin guruhdan chiqishimiz uchun so‘nggi imkoniyat bo‘ladi. Guruhdagi vaziyat juda qiyin. Agar o‘z imkoniyatlarimizni ishga solsak, oldimizga qo‘yilgan vazifani uddalay olamiz. “Lokomotiv” ishtirokidagi so‘nggi 3 o‘yinni kuzatdik. Alohida bir futbolchini ajratmagan bo‘lardim, raqib barcha chiziqlarni agressiv o‘yin namoyish qiladi.
Bo‘lajak o‘yinni birinchi turda bo‘lib o‘tgan uchrashuvga qiyoslash qiyin. “Al-Tavun”da yaqinda ish boshladim. Bitta narsani ayta olaman: katta o‘zgarishlar bo‘lmaydi, biz o‘yin uslubimizni biroz o‘zgartiramiz”, – dedi Joze Manuel Gomesh.
Matbuot anjumanining ikkinchi qismida “Lokomotiv” ustozi Andrey Miklyayev va yarim himoyachi Sardor Mirzayev ishtirok etdi.
“Biz uchun ham ertangi o‘yin guruhdan chiqishga so‘nggi imkoniyat. Raqib buni yaxshi tushunib turibdi. Tarkibda yo‘qotishlar bor — Salamat Qutiboyev. Muhammad Koneda esa yengil jarohat mavjud. Oxirgi ikki o‘yindan buyon u individual tarzda mashg‘ulotlar o‘tamoqda. Futbolchilarning jismoniy holati yaxshi. Ertaga muxlislarning daldasi bizga yo‘l kelgan bo‘lardi”, – dedi “temiryo‘lchilar” ustozi.
“Al-Tavun”ga qarshi o‘yin qiziqarli va shu bilan birga qiyin kechadi. OCHLdagi so‘nggi ikki o‘yinim o‘xshamadi. O‘z ustimda ishladim va sifatli o‘yin ko‘rsatishga harakat qilaman”, – dedi Sardor Mirzayev.
Eslatib o‘tamiz, “Lokomotiv” – “Al-Tavun” uchrashuvi ertaga, 25 aprel kuni TTZ mavzesidagi “Lokomotiv” stadionida, soat 17:00 da start oladi.
