Fors matbuotida Eron terma jamoasi futbolchilarining mamlakat futbol federasiyasining hatti-harakatlaridan norozi bo‘layotgani haqida xabarlar e’lon qilindi.
Xususan, Emtiazdaily xabariga ko‘ra, Eron futboli rahbarlari futbolchilarga va’da qilingan mukofot pullarini berishni kechiktiryapti. Bu esa futbolchilarning norozilik kayfiyatini kuchaytirmoqda.
Agar voqealar rivoji shu tarzda davom etadigan bo‘lsa, eronlik futbolchilar JCH-2018 saralashidan o‘rin olgan O‘zbekistonga qarshi o‘yinda maydonga tushishdan bosh tortishi, natijada, Eron texnik mag‘lubiyat bilan jazolanishi mumkin.
Eslatib o‘tamiz, mazkur uchrashuv 12 iyun kuni Tehrondagi “Ozodiy” stadionida Toshkent vaqti bilan soat 21:45da start olishi kerak. Agar Eron o‘yinda g‘alaba qozonsa, muddatidan oldin JCH-2018 yo‘llanmasini qo‘lga kiritadi.
