Ma’lumki, taniqli nemis avtopoygachisi Mixael Shumaxer bir necha yildan buyon og‘ir xastalikka duchor bo‘lib, to‘shakka mixlanib qolgan edi.

O‘tgan yili yozda Mayns shahrida Germaniya Gran Prisidan oldin, “Opel Arena” stadionida taniqli avtopoygachi Mixael Shumaxer sharafiga bag‘ishlangan xayriya futbol uchrashuvi o‘tkazilgan edi.

Nazionale Piloti poygachilar jamoasi Dirk Noviski boshchiligidagi NBA afsonalari termasiga qarshi bahs olib borgan edi.

Mazkur bahsda Nazionale Piloti jamoasi tarkibida yetti karra jahon chempionining o‘g‘li Mika Shumaxer ham ishtirok etib,bir bor gol urishga muvaffaq bo‘lgan edi.

Navbatdagi aksiya esa 3 iyul sanasida o‘tkazilishi aniq bo‘ldi. U yana Opel Arenada bo‘lib o‘tishi rejalashtirilgan va unda kichik Shumaxer ham ishtirok etishi ko‘zda tutilgan. U ayni damda Formula 3 poygalarida ishtirok etmoqda.

Mika Shumaxer: "O‘tgan yilgi uchrashuv juda ham qiziqarli o‘tgan edi, bunday xayriyalarda ishtirok etish maroqli. Fikrimcha, bu ko‘ngil ochar o‘yin bilan aniq maqsad sari yo‘naltirilgan ajoyib g‘oya. Men Dirk, qolgan ishtirokchilar va muxlislar manna shu maqsadda stadionga tashrif buyurishganidan xursandman", - dedi Mika Shumaxer.

Mazkur o‘yindan tushgan mablag‘ Dirk Noviskining xayriya fondiga va Mixael Shumaxer oilasi uchun ajratilgan Keep Fighting loyihasiga ajratiladi. Shuningdek, poygachilar jamoasida ikki karra jahon chempioni va bir vaqtlar Shumaxerning asosiy raqibi bo‘lgan Mika Hakkinen ham ishtirok etadi.