Маълумки, таниқли немис автопойгачиси Михаэл Шумахер бир неча йилдан буён оғир хасталикка дучор бўлиб, тўшакка михланиб қолган эди.

Ўтган йили ёзда Майнц шаҳрида Германия Гран Присидан олдин, “Опел Арена” стадионида таниқли автопойгачи Михаэл Шумахер шарафига бағишланган хайрия футбол учрашуви ўтказилган эди.

Nazionale Piloti пойгачилар жамоаси Дирк Новицки бошчилигидаги НБА афсоналари термасига қарши баҳс олиб борган эди.

Мазкур баҳсда Nazionale Piloti жамоаси таркибида етти карра жаҳон чемпионининг ўғли Мика Шумахер ҳам иштирок этиб,бир бор гол уришга муваффақ бўлган эди.

Навбатдаги акция эса 3 июл санасида ўтказилиши аниқ бўлди. У яна Опел Аренада бўлиб ўтиши режалаштирилган ва унда кичик Шумахер ҳам иштирок этиши кўзда тутилган. У айни дамда Формула 3 пойгаларида иштирок этмоқда.

Мика Шумахер: "Ўтган йилги учрашув жуда ҳам қизиқарли ўтган эди, бундай хайрияларда иштирок этиш мароқли. Фикримча, бу кўнгил очар ўйин билан аниқ мақсад сари йўналтирилган ажойиб ғоя. Мен Дирк, қолган иштирокчилар ва мухлислар манна шу мақсадда стадионга ташриф буюришганидан хурсандман", - деди Мика Шумахер.

Мазкур ўйиндан тушган маблағ Дирк Новицкининг хайрия фондига ва Михаэл Шумахер оиласи учун ажратилган Keep Fighting лойиҳасига ажратилади. Шунингдек, пойгачилар жамоасида икки карра жаҳон чемпиони ва бир вақтлар Шумахернинг асосий рақиби бўлган Мика Ҳаккинен ҳам иштирок этади.