Англиялик ёрдамчи ҳакам Шон Мэсси-Эллис ҳакамлик фаолиятини якунлади. Бу ҳақда Sky Sports хабар берди.
Мэсси-Эллис 2010 йилда «Блэкпул» ва «Сандерленд» ўртасидаги учрашувда Англия чемпионатининг юқори дивизионида дебют қилган ва мамлакат тарихида Премьер-лигада ишлаган иккинчи аёл-лайнсменга айланган.
40 ёшида фаолиятини якунлаган Мэсси-Эллис АПЛда 150 дан ортиқ учрашувда ишлади. Шунингдек, у аёллар ўртасидаги Англия Кубоги финалида беш марта, Англия Суперкубоги баҳсида ҳакамлик қилди. Шон Англия Кубоги ва Лига Кубоги финалларида VAR ҳаками сифатида ҳам фаолият юритган.
2019 йилда Мэсси-Эллис Европа клуб мусобақаларида учрашувга тайинланган биринчи англиялик аёл-лайнсмен бўлди. У ўша йили Европа Лигаси доирасидаги «ПСВ» — «ЛАСК» учрашувида ёрдамчи ҳакам сифатида ишлади.
Sky Sports маълумотига кўра, Мэсси-Эллис сентябрь ойидан Англия Футбол ассоциациясида (FA) фаолият юритади. У ерда аёл ҳакамлар билан ишлаш бўйича катта менежер лавозимида ишлаб, ҳакамлик касбини танлаган аёлларни қўллаб-қувватлаш ва уларнинг ривожланишига кўмаклашади.
