«Real» bosh murabbiyi Zayniddin Zidan Yevropa chempionlar ligasi yarim final bosqichi doirasida "Atletiko"ga qarshi javob o‘yini oldidan o‘z fikrlarini bildirib o‘tdi.

«Odatdagidek o‘ynaymiz. Maydonga tushamiz va g‘alaba haqida o‘ylaymiz. Buning uchun qo‘ldan kelgan barcha ishni qilamiz. Ko‘ramiz, nimalarga erisharkanmiz. Lekin dastlabki o‘yin natijasi jamoa o‘yin falsafasiga ta’sir ko‘rsatmaydi. G‘alaba qozonish uchun bor kuchimizni beramiz. Biz golli o‘yinlar seriyamizni yangilashni istaymiz («Real» ketma-ket 60ta o‘yindan beri kamida 1ta gol urib kelmoqda). Bu tomonlama hech narsa o‘zgarmaydi.

Men va shogirdlarim uchun ertaga faqat bitta narsa muhim. «Atletiko» bizga o‘z uslubimizda o‘ynashimizga xalal berishga intiladi. Ularning o‘yini shundan iborat. Biz esa avvalgidek o‘ynashda davom etishimiz kerak. Bu uslub yarim finalgacha yetib kelishimizga yordam berdi. Hech narsa o‘zgarmaydi. G‘oya o‘sha — bor kuchimizni beramiz. Ilk daqiqalardanoq bu fikr boshimizda bo‘lishi lozim», – dedi Zidan.

«Atletiko» – «Real» bahsi 10 may, chorshanba kuni 23:45da boshlanadi.