“Lokomotiv” O‘zbekiston kubogi 1/8 final o‘yinlari doirasida “Qizilqum” bilan bahs yuritib, 5:0 hisobida g‘alabaga erishdi.

Taqvim tig‘iz ko‘rinish olgani sabab jamoa bugundan navbatdagi uchrashuvga tayyorgarlikni boshlab yubordi.

Oldinda “Lokomotiv”ni Oliy Liga 12-turidan o‘rin olgan “Neftchi”ga qarshi o‘yin kutmoqda. Bugun “temiryo‘lchilar” klub qarorgohida kechagi bellashuvdan keyingi tiklanish mashg‘ulotini o‘tkazishdi.

Mashg‘ulotda “Lokomotiv” futbolchilari bilan birgalikda milliy terma jamoamizning ayni paytda Toshkentda bo‘lib turgan o‘yinchilari – Azizbek Haydarov hamda Temurxo‘ja Abduxoliqov ham ishtirok etishdi. Bugungi mashg‘ulot 2 ga bo‘lingan holda olib borilganini qayd etish joiz.

Kecha “Qizilqum” bilan uchrashuvda ishtirok etgan futbolchilar yengil yugurish, chigalyozdi mashqlari bajarish va trenajyorda ishlash bilan cheklanishgan bo‘lsa, kechagi o‘yinda qatnashmaganlar va terma jamoa a’zolari maydonda to‘p bilan muomala mashqlarini ham o‘tashdi.