Moskvaning «Spartak» klubi 16 yillik tanaffusdan so‘ng Rossiya chempionligini qo‘lga kiritdi. Albatta, jamoaning muvaffaqiyatida klub xujayini Leonid Fedunning hissasi kattadir. Yaqinda u «Sport-Ekspress» nashriga eksklyuziv intervyu berdi.
- «Spartak»ning bu g‘alabasini nohaq deyilsa, til aylanmay qoladi...
- Kimlarnikidir aylanaveradi.
- Kimniki?
- Chervichenkoniki.
- Oltin medallar «Spartak»niki bo‘lishi aniq bo‘lganidan so‘ng siz «Ancha yengilladim» degandingiz. «Zenit»-«Terek» uchrashuvi yakunlanganidan keyin nimalarni his qildingiz?
- Haqiqatan ham yengilladim. 2003 yili klub aksioneri bo‘lganman. Bir yildan so‘ng nazorat paketini sotib olganman. O‘tgan vaqt mobaynida bir necha marta sovringa yaqin kelganmiz. 2006 va 2009 yillarni eslang. Oltin medallarga juda yaqin kelgandik. Ammo ayrim sub’ektiv sabablar tufayli chempion bo‘la olmagandik. Keyin qora chiziq paydo bo‘ldi. Uning orqasidan birin-ketin moliyaviy inqiroz. Stadion qurilishi. Bozorning o‘zgarishi va shunga o‘xshash jihatlar natijaga erishishimizga to‘sqinlik qildi. Boz ustiga, sportga zid holatlar. Masalan, Velliton bilan bo‘lgan vaziyat. Albatta, bularning barchasi ishimizni og‘irlashtirdi. Muxlislar ham agressiv bo‘lib ketishdi. SSKAni bir necha yil mag‘lub eta olmaganimizda qanchalik qayg‘urishganini ko‘rganman. Shuning uchun Bajenovning g‘alaba to‘pidan ke-yin ham yengil tortdim. Ich-ichimdan chempion bo‘lishimizga ishongandim. Chunki «Spartak» kuchayish bilan birga raqiblar o‘sishmadi. Lekin baribir, qiyinchiliklar bo‘ldi va doimiy stress. «Oltin»ni olganimizdan so‘ng ancha yengilladim. Hattoki, bu quvonch emas. «Nihoyat, sodir bo‘ldi», degan hissiyot.
- Hammasini tashlab, unutish haqida o‘ylaganmisiz?
- Xayollar har qanday bo‘lishi mumkin. Lekin g‘alaba qozonmasdan barchasini tashlamas edim. Men erkakman. Biznesda birinchi yil emasman va o‘z xarakterimni bilaman. Shu bois ham oxirigacha borishimni bilardim.
- «Spartak»ning xo‘jayini sifatidagi eng qiyin davringiz qaysi?
- 2009 yili juda achinarli bo‘lgan. O‘sha jamoa birinchi o‘ringa loyiq edi. Lekin Bistrov ketdi, g‘alaba qozonadigan o‘yinlarimizda olti ochko yo‘qotdik. Bu kutilmaganda bo‘ldi. O‘shanda chempionlik qo‘limizda deb o‘ylagandik.
- Joriy mavsum davomida ham shunga o‘xshash vaziyat kuzatildi. O‘shanda cho‘chimadingizmi?
- Alenichev ketganidan to Karreraning doimiy ravishda tayinlanishigacha bo‘lgan vaqt qiyin kechdi. Muxlislar va matbuotning bosimi tinimsiz davom etdi.
- Qurbon Berdiyev bilan muzokaralar qanday kechganini ayta olasizmi? Bu borada gap- so‘zlar ko‘p bo‘ldi. Lekin barchasini birinchi og‘izdan eshitmoqchimiz.
- Bu ikkimizning oramizda qoladi. U izoh bermaydi. Men ham shunday.
- Karreraga ishonsa bo‘lishini qachon anglab yetdingiz?
- Keling, bir narsani esga olaylik. Uning nomzodi bexosdan yuzaga kelgandi. Bir necha yil oldin Antonio Konte bilan muzokara olib borganman. U «Spartak»ni boshqarishga tayyor edi. U bilan murabbiylar shtabi haqida gaplashganmiz. O‘shanda «Karrera» familiyasi ham esga olingan. Alenichevning shtabi o‘z ishini bajara olmagach, uni kuchaytirishni boshladik. Shu tariqa Pilipchuk va Karreralar kelib qolishdi. U avvaliga jamoaning himoyasiga javob berardi.
- Berdiyev nomzodiga umuman qaytmaysizmi?
- Hech qachon, «hech qachon» dema. Lekin tez orada qaytmasligim aniq.
