Futbolda birinchi o‘rinda natija tursa-da, biroq natijaga yetishish yo‘lida qilingan mashaqqatlardan bahra olishga yetadigani bo‘lmasa kerak. Maydonda futbolning nozik tomonlarini, haqiqiy chiroyini ko‘rsatadigan futbolchilar, albatta, bo‘ladi. Ularning harakatini kuzatish juda ham maroqlidir. Bular pleymeykerlar!
Atamalogiya
Odatda, pleymeykerlar deb hujumkor yarim himoya pozisiyasida o‘ynaydiganlarni va hujumni yakunlovchi pas beradigan futbolchilarni nazarga tutishadi. Biroq to‘liq ma’lumotlardan kelib chiqqan holda, kim hujumni tashkil qilishda katta rol o‘ynasa va o‘yinni boshqarsa, o‘sha futbolchini bemalol pleymeyker deb atashimiz mumkin. Masalan, Andrea Pirlo yoshligida tayanch yarim himoyasidan turib yakunlovchi paslar bergan, Leonardo Bonuchchi himoyadan turib pleymeykerlik qilyapti. Antonio Konte hozir David Luizni “Chelsi”da mana shu vazifada o‘rgatmoqda, ya’ni himoyadan turib pleymeykerlik qilishga.
Lider
Oxirgi turdan so‘ng 3 ta futbolchi natijani 10 tadan ko‘tara olishdi. Bularning orasida yaqqol peshqadamlik qilgan futbolchi bu Kevin de Bryuyne. Belgiyalik yarim himoyachi hisobida 17 ta assistentlik mavjud. Gvardiola uni qaysi pozisiyada o‘ynatmadi deysiz, o‘ng-chap qanot yarim himoyalarida, hujumkor yarim himoyada va hatto markaziy yarim himoyada ham. Ko‘p holatda u joyini jamoadagi yana bir kreativ futbolchi — David Silva bilan almashtirib turardi. Shunday bo‘lsa-da, Kevin yaxshi mavsum o‘tkazmoqda, biroq gol urish bo‘yicha ochiqchasiga omadi kelmayotganini tan olish kerak. Juda ko‘p zarbasi darvoza ustuni yoki to‘siniga tekkan.
Ko‘rinmas lider
De Bryuynedan so‘ng ikkinchi o‘rinda Gyulfi Sigurdsson bormoqda. Gyulfi gol+pas bo‘yicha Kevindan oldinda, 14 ta assistentlik qilgan bo‘lsa-da, Kevindan ko‘ra ko‘proq gol urishga muvaffaq bo‘lgan. Aynan Sigurdssonning sa’y-harakatlari va yetakchiligi evaziga “Suonsi” APLda jon saqlab qoldi. Mavsum davomida islandiyalik futbolchini murabbiy ikki pozisiyada harakat o‘ynatdi. Agar jamoa ikki hujumchi bilan harakat qilsa, Gyulfi hujumkor yarim himoyachi vazifasida tushadi, agar 3 ta hujumchi bo‘lsa, chap qanot hujumchisi sifatida harakat qiladi. Ikkinchi rol unga ko‘proq ma’qul, shekilli, shu pozisiyada ko‘proq assistentlik qilgan. Gyulfi “Suonsi” urgan 41 goldan 21 tasida ishtirok etgan. Bu tahsinga loyiq holatdir.
Qolganlar
Yana bir guruh pleymeykerlar bor, ajoyib texnikaga ega, kreativ futbolchilar, biroq ularga davomiylik yetishmadi. O‘zil, Mata, Fabregas — hammaning o‘rni har xil. Kimdir bir maromda harakat qilmadi, kimdir juda kam maydonga tushgan, kimnidir esa jamoadoshlari pand berishgan. Ularga mavsumdagi holat yetishmadi. Bu futbolchilar nimaga qodir ekanliklarini hamma juda ham yaxshi bilishadi. Shuning uchun ham ulardan keyingi mavsumda yana avvalgi o‘yinlarini kuchaygan holatdagisini kutib qolamiz.
