Turnir tarixi
Konfederasiyalar kubogi (inglizcha talqini – FIFA Confederations Cup) – FIFA tomonidan navbatdagi jahon chempionatiga mezbonlik qiluvchi mamlakat hududida terma jamoalar ishtirokida tashkillashtiriladigan turnir. Mundial startiga 1 yil vaqt qolganida o‘tkaziladigan musobaqada 6 ta qit’a/hudud – Yevropa, Janubiy Amerika, Shimoliy va Markaziy Amerika, Afrika, Osiyo hamda Okeaniyada tegishlicha UYEFA, KONMEBOL, KONKAKAF, AFK, OFK va OkFK tomonidan o‘tkaziladigan chempionatlar g‘oliblari ishtirok etadi.
Shuningdek, jahonning amaldagi chempioni va bo‘lajak JCHga mezbonlik qiluvchi mamlakat jamoasi ham ishtirokchilar qatoriga qo‘shiladi. Agarda jahon chempioni qit’a birinchiligida ham g‘olib chiqqan bo‘lsa, unda turnirga o‘sha hudud chempionati finalchisi taklif etiladi. Konfederasiyalar kubogi “Qirol Fahd kubogi”dan kelib chiqqan. O‘sha musobaqa 1992 va 1995 yillarda Saudiya Arabistonida xuddi shu tizimda yo‘lga qo‘yilgandi. 1997 yilga kelib, FIFA ilk rasmiy turnirni tashkil etdi. Boshida Konfederasiyalar kubogi har 2 yilda bir marta o‘tkazilgan. 2005 yildan e’tiboran esa ikki turnir o‘rtasidagi muddat xuddi JCHniki singari 4 yilga uzaytirildi.
2003 yilgi musobaqada katta fojia kuzatilgan. Ya’ni kamerunlik Mark-Vivyen Foe Kolumbiya termasiga qarshi kechgan yarim final o‘yini payti yurak xuruji sabab olamdan ko‘z yumgandi. Umuman olganda, Konfederasiyalar kubogi tarixida 5 ta jamoa g‘oliblik nashidasini surgan – Argentina, Daniya (“Qirol Fahd kubogi” davrida), Braziliya, Meksika va Fransiya terma jamoalari. Amaldagi chempion – Braziliya termasi bu safar musobaqada ishtirok etmaydi.
Konfederasiyalar Kubogi-2017 musobaqasini mezbon Rossiya terma jamoasi Yangi Zelandiyaga qarshi o‘yin bilan ochib beradi. Uchrashuv Toshkent vaqti bilan 20:00 da start oladi.
Musobaqa ishtirokchilari: Rossiya (musobaqa mezboni), Germaniya (JCH-2014 g‘olibi), Portugaliya (Evro-2016 chempioni), Avstraliya (Osiyo Kubogi-2015 sohibi), Chili (Amerika Kubogi-2015 g‘olibi), Meksika (KONKAKAF chempioni), Yangi Zelandiya (Okeaniya Millatlar Kubogi-2016 g‘olibi) va Kamerun (Afrika millatlar Kubogi-2017 chempioni).
“A” guruhi: Rossiya, Yangi Zelandiya, Portugaliya, Meksika
“V” guruhi: Kamerun, Chili, Avstraliya, Germaniya
Musobaqa Rossiyaning to‘rtta shahrida bo‘lib o‘tadi: Moskva (“Spartak” stadioni), Sochi (“Fisht” stadioni), Sankt-Peterburg (“Sankt-Peterburg Arena”) va Qozon (“Kazan Arena”).
Ma’lumot uchun, Rossiya, Portugaliya va Chili terma jamoalari ushbu musoboqada birinchi marta ishtirok etadilar.
O‘zbekistonning “Sport” telekanali orqali mazkur musobaqaning o‘yinlari to‘g‘ridan-to‘g‘ri jonli efirda ko‘rsatilishi rejalashtirilgan.
