1-davrani ko‘tarinki kayfiyatda o‘tkazgan jamoamiz a’zolari, qisqa muddatli ta’tildan qaytdilar.
Kecha Chirchiq shahrida yig‘ilgan futbolchilarimiz 2-davraga tayyorgarlikni boshlab yuborishdi. Mashg‘ulotlar bugundan boshlab kuniga 2 mahaldan bo‘lib o‘tadi. Futbolchilar bosh murabbiyimiz tomonidan ishlab chiqilgan reja bo‘yicha tayyorgarlikni olib borishadi.
Muxlislarimizga bir xushxabarni yetkazmoqchimiz. O‘zining ajoyib o‘yinlari bilan Qo‘qonlik muxlislar mehrini qozongan Quvondiq Ro‘ziyev jamoamiz safiga kelib qo‘shildi. Ro‘ziyev 2-davrani jamoamiz safida o‘tkazadi. Hozircha safimizda boshqa yangi futbolchilar yo‘q.
Serbiyalik legionerlarimiz Darko Gojkovich hamda Filip Rayevaslar yig‘inga biroz kechroq qo‘shiladilar. Ular ayni damda o‘z yurtlarida hordiq chiqarmoqdalar.
Jamoamiz mashg‘ulotlarida darvozabon Muzaffar Abdullayev ishtirok etmayapti. Abdullayev 2-davrani sobiq jamoasi, Jizzaxning «So‘g‘diyona» klubida o‘tkazish ehtimoli yuqori.
O‘quv – yig‘in mashg‘ulotlari davomida «Qizilqum» va «Neftchi» jamoalari bilan nazorat o‘yinlari o‘tkazish rejaga kiritilgan.