Poytaxtimizda shaxmat bo‘yicha “Tanish chehralar” turniri bo‘lib o‘tdi.
Professional hamda havaskor shaxmatchilarni bir joyda jamlaydigan ushbu ana’naviy musobaqada bu yil Rustam Qosimjonov ham ishtirok etdi. XVII Jahon chempioni musobaqa davomida Respublika ixtisoslashtirilgan bolalar va o‘smirlar shaxmat maktabi o‘quvchilariga qarshi bir vaqtning o‘zida 20ta shaxmat taxtasida seans o‘tkazdi.
Tadbir davomida OAV vakillari hamda muxlislar ishtirokida matbuot anjumani ham tashkil qilindi.
Kelajakda yurtimizda Rustam Qosimjonov nomidagi shaxmat maktabi ochilishi mumkin.
“Maktabga nom berish oson, ammo uning ishini muntazam tarzda yuritish qiyin. Bu ishni yuqori saviyaga olib chiqish insondan katta kuchni talab qiladi. Men maktab ochsam shunchaki nomimni berib, ishlarni boshqa insonga topshirmoqchi emasman. Shaxmatchi sifatida faoliyatimni tugatganimdan keyin, bu balki 5 yil, balki 10 yildan keyindir, ana o‘shanda bu ish bilan astoyidil shug‘ullanaman” – deb ta’kidlab o‘tdi Qosimjonov.
